Stjarnan skellti tvisvar á Belichick: „Það er eins gott að þetta sé ekki grín“

Belichick var gestur í þætti Pat McAfee í gær og verður áfram um helgina. Þar var hann spurður út í stærstu skiptin sem hann hefði gert á nýliðavali.

Það hafi án efa verið þegar hann fékk Randy Moss til Patriots árið 2007. Þáverandi lið Moss, Oakland Raiders, vildi losna við hann og Belichick stökk á tækifærið. Hann hringdi í Moss um miðja nótt á meðan nýliðavalinu stóð.

„Við höfðum reynt að fá hann í tvo mánuði, þetta var erfið fæðing. Eftir fyrsta dag nýliðavalsins talaði ég við Hr. Davis (hjá Raiders) og hann sagðist taka því fyrir val í fjórðu umferð,“ segir Belichick. Tíminn var þá naumur, enda þurfti að ganga frá skiptunum áður en kæmi að valréttinum daginn eftir.

„Við þurftum að koma honum í læknisskoðun og endursemja um samninginn hans,“ sagði Belichick þá við Davis.

„Það er þitt vandamál,“ svaraði Al Davis, sem var stjórnandi hjá Raidersliðinu.

Belichick hringdi þá í Moss ítrekað en stjarnan skellti á hann þar sem hann hélt að um símaat væri að ræða þegar þjálfarinn kynnti sig í símann.

„Hver er þetta? Hver er að gera at í mér?“ á Moss að hafa sagt í símann. „Er þetta grín? Það er eins gott að þetta sé ekki grín.“

Söguleg, stórkostleg en sorgleg leiktíð

Moss reddaði sér næsta flugi og tólf tímum síðar hafði hann gengið frá læknisskoðun og samningi. Tímabilið 2007 var í kjölfarið hans besta leiktíð á ferlinum og má færa rök fyrir því að það hafi verið besta leiktíð nokkurs grípara í sögu deildarinnar.

Moss naut sín hjá liðinu og greip fyrir 23 snertimörkum á fyrstu leiktíð, eitthvað sem enginn útherji hefur gert fyrr né síðar á einu og sama tímabilinu. Þrátt fyrir að ráða yfir gríðarsterku liði leiddu af Brady og Moss tókst útherjanum aldrei að vinna meistaratitil með félaginu.

Leiktíðina 2007 vann Patriots liðið alla 16 leiki sína í deildarkeppninni, tvo í úrslitakeppninni en missteig sig í Ofurskálinni gegn Eli Manning og félögum í New York Giants sem unnu magnaðan 17-14 sigur í einum frægasta Super Bowl leik sögunnar.

Sjá má skemmtilega frásögn Belichick í spilaranum að ofan.

Sýnt verður frá nýliðavalinu í NFL á Stöð 2 Sport 2 í kvöld frá klukkan 23:00 og stendur útsending yfir fram eftir nóttu. Valið heldur áfram á morgun frá klukkan 16:00 á Stöð 2 Sport 3.