Tiger þarf að spila 23 holur í dag

Veðrið var til vandræða á Mastersmótinu i gær og Woods náði aðeins að klára þrettán af átján holum á fyrsta hringnum. Hann lék þessar þrettán holur á 51 höggi eða einu höggi undir pari. Tiger deilir sautjánda sætinu eins og er meðal annars með Rory McIlroy sem náði þó að klára hringinn sinn.

Woods hefur ekki náð að klára opinbert PGA mót síðan hann kom til baka úr ökklaaðferð í apríl 2023 og óvíst hvort skrokkurinn hjá honum haldi í dag.

Hinn 48 ára gamli Tiger þarf nefnilega að spila 23 holur í dag.

Tiger byrjar á því að fara út klukkan 7.50 fyrir hádegi á staðartíma eða rétt fyrir tólf á íslenskum tíma. Þar þarf hann að klára þessar fimm síðustu holur á fyrsta hringnum.

Hann hefur ekki langað tíma til að jafna sig eftir þessar fimm holur því annar hringurinn hans á að hefjast klukkan 10.18 að staðartíma eða klukkan átján mínútur yfir tvö að íslenskum tíma.

Tiger er þar í ráshóp með þeim Jason Day og Max Homa.

Woods vonast þó til að biðin verði sem styðst. „Þetta var góð leið til að klára þessar fyrstu þrettán holur,“ sagði Woods ánægður með gengið í gær.

Hann er að vonast eftir því að þurfa ekki að bíða í meira en hálftíma eftir að geta byrjað annan hringinn. Það gæti verið slæmt fyrir hann að kólna mikið niður á milli þess að klára fyrrnefndar fimm holur og fara aftur út.

„Skrokkurinn er í góðu lagi. Við munum vinna aðeins í honum í kvöld,“ sagði Woods.

Útsending dagsins frá Mastersmótinu hefst klukkan 19.00 á Stöð 2 Sport 4.