Banka­stjóri segir Lands­bankann ekki vera ríkis­fyrir­tæki

Greint var frá því á heimasíðu Landsbankans í gær að hann hefði komist að samkomulagi við Kviku banka um kaup á öllu hlutafé í TM tryggingum hf. samkvæmt tilboði frá því á föstudag upp á 26,8 milljarða króna. Haft er eftir Helgu Björk Eiríksdóttur formanni bankaráðs Landsbankans að málið hafi verið rætt meðal stjórnenda og ráðsins undanfarið. Enda fari tryggingastarfsemi og rekstur á stórum viðskiptabanka vel saman.

Þórdís Kolbrún R. Gylfadóttir sem stödd er í útlöndum samkvæmt heimildum fréttastofu brást illa við þessum tíðindum á Facebook síðu sinni strax í gærkvöldi. „Ríkisfyrirtæki á ekki að kaupa tryggingafélag. Ríkið á að losa um tugi milljarða og umbreyta þeim í samfélagslega innviði sem almenningur nýtur góðs af og byggir undir frekari verðmætasköpun og samkeppnishæfni allra landshluta,“ segir fjármálaráðherra á Facebook.

Lilja Björk Einarsdóttir bankastjóri Landsbankans segist sammála fjármálaráðherra um mikilvægi þess að stuðla að samkeppni á fjármálamarkaði.

„Það er hvatinn að því að við förum í þessi kaup á TM. Þar sem við erum að stuðla að því að auka verðmæti bankans,“ segir Lilja Björk.

Enginn kallað eftir ríkisrekstri á tryggingafélögum

Þórdís Kolbrún minnir á fyrirheit í stjórnarsáttmála um að draga eigi úr eignarhlut ríkisins í fjármálakerfinu og nýta fjármuni sem liggja í slíkum rekstri í uppbyggingu innviða. Hún muni brátt leggja fram frumvarp um sölu á eignarhlut ríkisins í Íslandsbanka.

„Kröftum okkar er betur borgið í öðrum fjárfestingum en í tryggingastarfsemi, sem af mér vitandi enginn hefur kallað eftir að sé í ríkisrekstri,“ segir fjármálaráðherra. Ríkisfyrirtæki ætti ekki að kaupa tryggingafélag og hún hafi kallað eftir skýrslu frá Bankasýslunni um þetta mál.

„Þessi viðskipti verða ekki að veruleika með mínu samþykki, nema söluferli Landsbankans hefjist samhliða," segir Þórdís Kolbrún á Facebook. En hingað til hefur verið miðað við að Landsbankinn yrði í meirihlutaeign ríkisins.

Þá hefur ráðherrum, þeirra á meðal Bjarna Benediktssyni fyrrverandi fjármálaráðherra, verið tíðrætt um armlengd ráðamanna frá rekstri fjármálastofnana.  Bankasýslan sæi um eignarhlut ríkisins í bönkunum. Bjarni boðaði reyndar síðast liðið haust að Bankasýslan yrði lögð niður með frumvarpi í janúar, sem enn hefur ekki litið dagsins ljós.

Aðalfundur Landsbankans er á miðvikudag en Bankasýsla ríkisins fer með hlut ríkisins í bankanum. Tryggvi Pálsson formaður stjórnar Bankasýslunnar vildi ekki tjá sig um málið þegar eftir því var leitað. Sagði Bankasýsluna vera að vinna í málinu og minntist á ósk fjármálaráðherra um skýrslu.

Lilja Björk segir Landsbankann ætla að halda kaupferlinu áfram. Halda verði til haga að Landsbankinn væri ekki ríkisfyrirtæki.

„Heldur er almenningshlutafélag nær eingöngu í eigu ríkisins. Það er mikilvægt fyrir okkur að huga að því hvernig við getum keppt á þessum markaði og aukið samkeppni. Það er það sem við erum að huga að,“ segir Lilja Björk. Með því að gera Landsbankann verðmætari aukist eign ríkisins í félaginu.

Svo er það ríkisins að ákveða hvað það gerir við eign sína í bankanum?

„Það er ekki á mínu borði,“ segir Lilja Björk Einarsdóttir bankastjóri Landsbankans.

Landsbankinn yrði ekki einn um að eiga tryggingafélag því Vörður er í eigu Arion banka. Þá áttu sér stað viðræður í fyrra um samruna Íslandsbanka og Kvikubanka eiganda TM. Þær viðræður runnu hins vegar út í sandinn í lok júní eftir uppákomuna í kringum sölu ríkisins á hlut í Íslandsbanka.

Kaup Landsbankans eru háð samþykki Samkeppniseftirlitsins og Fjármálaeftirlits Seðlabankans.