Árangur vetrarins skiptir litlu í kvöld

Selfoss hefur unnið alla 16 leiki sína í Grill 66-deildinni og hefur þegar tryggt sig upp í Olís-deildina á næstu leiktíð. Perla segir liðið sífellt vera að bæta sig.

„Við erum bara búnar að bæta okkur jafnt og þétt í allan vetur og það er engin ástæða til annars en að við mætum fullar sjálfstrausts í þennan leik,“ segir Perla Ruth í samtali við Vísi.

„Bikarinn er auðvitað önnur keppni og sama hvaða deild lið eru í eða hvernig hefur gengið í deildinni, þá geta öll lið átt nýtt lið í bikarnum. Það þurfa því allir að mæta 100 prósent til að ná úrslitum í kvöld.“

Fjölmenna í höllina

Stjarnan er í efstu deild en hefur gengið brösuglega. Liðin hafa ekki mæst áður í vetur og renna Selfyssingar að einhverju leyti blint í sjóinn.

„Við vitum ekkert hvernig er að mæta þeim. En við vitum að þær voru í hörkuleik við Val í síðustu umferð og eru með fullt af reynslumiklum leikmönnum. þannig að við þurfum að mæta klárar í hvað sem er og erum búnar að undirbúa okkur vel fyrir það,“

Búast má þá við fjölmenni af Selfossi í Laugardalshöllina í kvöld.

„Maður sér eiginlega ekki annað en auglýsingar fyrir þennan leik á samfélagsmiðlum. Við vitum að það er fullt af fólki að fara að mæta. Þetta verður virkilega fín stemning og ég hvet alla til að mæta. Þetta verður gaman,“ segir Perla Ruth.