Sam­mála Þor­steini: „Til há­borinnar skammar“

Valur Páll Eiríksson skrifar frá Stafangri

Ásmundur Einar mætti á fyrstu tvo leiki kvennalandsliðsins í handbolta hér í Noregi en á sama tíma var íslenska kvennalandsliðið í fótbolta að mæta Wales ytra í Þjóðadeildinni á föstudagskvöld. Eftir þann leik sendi Þorsteinn Halldórsson, þjálfari fótboltalandsliðsins, væna sneið á Ásmund. 

„Það væri áhugavert að hitta hann og spyrja hann um þessa hluti. Hann reyndar talar alltaf bara um þjóðarhöll og hefur aldrei minnst á þjóðarleikvang í neinni ræðu, hvar sem hann kemur. Hann hefur aldrei mætt á landsleik, þannig að ég veit ekki alveg hvernig við eigum að ná í hann,“ sagði Þorsteinn.

Þakkar kærlega fyrir

Það náðist í Ásmund hér í Stafangri og var hann inntur eftir svörum við gagnrýni Þorsteins. Hann tekur henni fagnandi.

„Ég er bara ánægður með þegar landsliðsþjálfararnir brýna okkur. Það á við hvort sem um ræðir knattspyrnuna, körfuboltann, handboltann, fimleikana eða aðrar íþróttir. Það er auðvitað þannig að aðstöðumál okkar fremsta íþróttafólks hafa verið engan veginn ásættanleg í mjög mörg ár,“

„Svona hvatningu tökum við áfram en við erum hins vegar með þetta í þeim farvegi núna, og erum að keyra það mjög fast pólitískt áfram að við ætlum að koma þjóðarhöll af stað. Þar erum við á síðustu metrunum að klára það milli ríkis og borgar. Í framhaldinu ætlum við að setja aðra þjóðarleikvanga, það er að segja knattspyrnuvöll og frjálsíþróttavöll, í sambærilega fasta pólitíska farveginn,“

„Ég er algjörlega sammála okkar fremsta íþróttafólki, hvort sem það eru þjálfarar, leikmenn eða aðrir, að þetta er til háborinnar skammar hvernig við höfum haldið á þessu. Þess vegna erum við að keyra þetta pólitískt áfram og svona hvatning hjálpar bara til þess að ýta málinu áfram. Þannig að ég vil bara þakka kærlega fyrir þetta.“

Hvað varðar mætingu á völlinn kveðst Ásmundur hafa fylgt fótboltalandsliðinu eftir á Evrópumót kvenna í fótbolta á Englandi síðasta sumar.

„Ég reyni að fara sem víðast á leiki, eins og ég get. Það á við um öll okkar landslið. Nú er ég hér að fylgja kvennalandsliðinu á heimsmeistaramót. Ég gerði slíkt hið sama þegar ég fylgdi kvennalandsliði knattspyrnunnar til Englands. Mér finnst sérstaklega gaman að fylgja kvennalandsliðunum okkar eftir og við eigum gera það sem við getum til að efla þau. Ég þakka hvatninguna. Ég reyni að mæta á eins marga viðburði og ég get og mun gera það áfram, hjá öllum sérsamböndum í öllum íþróttagreinum,“ segir Ásmundur.

Viðtalið allt má sjá í spilaranum hér að ofan.