Gömlu húsa­kynni Húrra glædd nýju lífi

„Bravó hefur síðastliðin ár verið í veldisvexti sem höfuðstaður electro tónlistar af öllum gerðum í Reykjavík. Hægt væri að segja hann minnsta-stærsta klúbb Evrópu miðað við þau tónlistarlegu þrekvirki sem unnin hafa verið þar inni. En, núna eru tímamót á Bravó! Núverandi rekstarstjóri Bravó, og drifkraftur í senunni, Klaudia Gawryluk og vinir, munu opna nýjan miklu stærri stað, í gömlu húsakynnum Húrra, Tryggvagötu 22 og munu þau taka við tónlistarkefli Bravó og halda áfram á harðahlaupum,“ segir í tilkynningu á Facebook-síðu Bravó.

Hljóðkerfi og annað tónlistartengt fer af Bravó og yfir á nýja staðinn og Bravó mun í kjölfarið taka breytingum. Opnunartímar munu breytast og mun Bravó loka fyrr heldur en áður. Áhersla verður lögð á bjór og drykki „með sérvöldum kvöldum meira í takt við vinylspilara heldur en hárri bassatíðni,“ eins og segir enn fremur.

Eigendur staðarins segjast spenntir fyrir því að geta boðið raftónlistarmönnum upp á alvöru klúbb á borð við það sem þekkist víða í Evrópu. Fengnir verði tónlistarmenn frá hinum og þessum löndum sem hingað til hafa ekki geta spilað í Reykjavík.