Norvik gerir yfir­töku­til­boð í ní­tján milljarða króna fé­lag

Í fréttatilkynningu um tilboðið segir að óháðir stjórnarmeðlimir Bergs styðji tilboðið og mæli með að hluthafar félagsins taki tilboðinu. Tilboðið sé háð fyrirvörum, svo sem um að Norvik eignist níutíu prósent hlut í félaginu og að viðeigandi yfirvöld veiti samþykki fyrir viðskiptunum.

Seldu Bergs erlenda starfsemi

Þá segir að fyrir tilboðið eigi Norvik tæplega 59 prósent hlut í Bergs og hafi verið stærsti hluthafi félagsins frá árinu 2016. Eignarhluturinn hafi komið til í kjölfar sölu Norvik á erlendri starfsemi sinni til Bergs. 

Síðan þá hafi Norvik stutt við uppbyggingu félagsins. Stefnt hafi verið á yfirtökur og önnur tækifæri, sem fæli í sér að eignarhlutur Norvik í félaginu færi lækkandi. 

„Sú stefna hefur ekki gengið eftir auk þess sem markaðsaðstæður hafa breyst til verri vegar. Til viðbótar hafa nýlegar aðgerðir, fjárfestingar og verkefni hjá Bergs ekki endurspeglast í skráðu gengi félagsins. Norvik hefur því komist að þeirri niðurstöðu að tækifærin til að nýta möguleika Bergs til fulls séu meiri í óskráðu umhverfi,“ segir í tilkynningu.

Taka félagið af markaði eftir tæplega 40 ára veru þar

Bergs samstæðan samanstandi af sjálfstæðum dótturfélögum sem þróa, framleiða og markaðssetja timburafurðir. Félagið búi að langri reynslu í timburvinnslu með áherslu á sjálfbærni. Starfsemin fari fram í Svíþjóð, Eistlandi, Lettlandi, Póllandi og Bretlandi og um 1.400 manns starfi hjá félaginu. Vörur samstæðunnar séu seldar í um þrjátíu löndum og Bergs hafi verið skráð á Nasdaq Stockholm frá árinu 1984.

Norvik er eignarhaldsfélag í eigu Jóns Helga Guðmundssonar og fjölskyldu. Fjölskyldan er með langa sögu í fjárfestingum þar sem megináherslan hefur verið lögð á timburiðnað, byggingarefni, smásölu og heildsölu, fasteignir og vörustjórnun. Vegferðin hófst árið 1962 með stofnun BYKO. Í dag er BYKO enn í eigu Norvik ásamt fasteignafélaginu Smáragarði og Kambstáli. Norvik er einnig stór hluthafi í íslensku félögunum Kaldalóni og Heimkaup. Erlendis hefur Norvik fjárfest í Bergs og GreenGold, sænsku félagi sem á og rekur skóga í nokkrum löndum Evrópu. Norvik hefur komið að fjöldamörgum verkefnum og fjárfestingum bæði hér heima og erlendis.