Neytendastofa með rassíu í Skeifunni

Oddur Ævar Gunnarsson skrifar 24. ágúst 2023 10:57

Frá Skeifunni, þar sem Neytendastofa gerði rassíu vegna verðmerkinga. Vísir/Vilhelm

Neytendastofa hefur sektað verslanir 66°Norður, Hagkaups, Herralagersins og Kulda í Skeifunni vegna verðmerkinga, eða skorti þar á.

Þetta kemur fram í tilkynningu á vef Neytendastofu. Þar segir að stofan hafi gert skoðun á ástandi verðmerkinga hjá verslunum í Skeifunni í lok maí.

Farið var í 45 verslanir og gerð athugun á hvort söluvörur væru verðmerktar auk þess sem skoðað var sérstaklega hvort verðmerkingar væru sýnilegar á útstillingum, til dæmis í sýningargluggum.

Í fyrri heimsóknum voru gerðar athugasemdir við fjórtán verslanir sem bæta þurftu verðmerkingar. Skoðuninni var fylgt eftir hjá þessum fjórtán fyrirtækjum og höfðu tíu þeirra bætt úr verðmerkingum til samræmis við athugasemdir stofnunarinnar þannig að ekki reyndist tilefni til frekari aðgerða.

Hjá verslunum 66°Norður, Hagkaups og Kulda vantaði verðmerkingar á ýmsar vörur í verslun við seinni heimsókn. Þá vantaði verðmerkingar á útstillingar hjá Herralagernum og 66°Norður. Hafa umræddar verslanir því nú verið sektaðar fyrir ófullnægjandi verðmerkingar.

Neytendur Verslun Reykjavík

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.