Öl­gerðin vinnur að því að fá vottun sem hin­segin vænn vinnu­staður

Ölgerðin og Samtökin 78 skrifuðu nýlega undir viljayfirlýsingu þar sem stefnt er að því að Ölgerðin fái vottun sem hinsegin vænn vinnustaður, fyrst fyrirtækja á Íslandi. Um tilraunaverkefni er að ræða en í því felst meðal annars fræðsla til starfsfólks, kannanir verða framkvæmdar, úttekt á fyrirtækinu með hinseginleika í huga og loks formleg vottun af hálfu Samtakanna 78 fyrir árslok 2023.

Andri Þór Guðmundsson er forstjóri Ölgerðarinnar.

„Já á mannamáli snýst þetta um hjá okkur í Ölgerðinni að búa til og hlúa að menningu, sem er fordómalaus og styður að allir eigi jafna möguleika. Við erum að leggja mikla áherslu á fjölbreytileika hjá okkur. Einsleitur hópur starfsmanna mun ekki taka bestu ákvarðanirnar, það verður ekki besta fyrirtækið í framtíðinni,“ segir Andri Þór.

Hjá Ölgerðinni eru 375 stöðugildi starfsmanna. En er mikið af hinsegin starfsfólki þar?

„Það þekki ég ekkert en án efa, það hlýtur að vera en ég skipti mér auðvitað ekkert af því,“ segir Andri Þór.

Þannig að þið eruð ekkert að spá í það?

„Nei, nei, það skiptir ekki máli. Aðalmálið er það að hér sé fordómalaus menning og að öllum líði vel í vinnunni hvernig sem þeir eru.“

Hvað heldur þú að þessi samningur gefi ykkur?

„Fyrst og fremst víðsýni og kannski meiri samkennd og kannski gerir þetta okkur, sem fyrirtæki að betri þjóðfélagsþegni ef við getum orðað það þannig,“ segir Andri Þór.