Ekki Samherji sem biðst afsökunar

Karl Eskil Páls­son, upp­lýsinga­full­trúi Sam­herja, segir í sam­tali við Vísi að falsaða heima­síðan sé vistuð í Bret­landi. Hann segir að fyrir­tækið hafi óskað eftir því að hún verði tekin niður.

Á falsaðri vef­síðu Sam­herja stendur flenni­stórum stöfum á skjánum að fyrir­tækið biðjist af­sökunar. Í til­kynningu á hinum falsaða vef segir að fyrir­tækið heiti betr­um­bót og sam­starfi við yfir­völd vegna málsins.

„Þetta er fölsk síða sem er engan veginn á okkar vegum og frétta­til­kynning sem send var út í gegnum þess­sa fölsku heima­síðu tengist Sam­herja á engan hátt,“ segir Karl Eskil.

Hann segir for­svars­menn fyrir­tækisins hafa orðið varir við síðuna í morgun. Hann segir greini­legt að síðan hafi verið unnin af fag­fólki.

„Það hefur verið óskað eftir því við þar­til­bær yfir­völd að þessi vef­síða verði tekin niður enda engan veginn á vegum fyrir­tækisins,“ segir Karl Eskil.

„Þetta er vel upp sett heima­síða, greini­lega gerð af fag­fólki þar sem okkar stafa­gerð og lógó er notað. Þetta er al­vöru heima­síða og gríðar­lega mikil vinna lögð í þessa heima­síðu og send út frétta­til­kynning í gegnum þessa síðu og það er náttúru­lega eitt­hvað sem ekki er hægt að búa við og við höfum óskað eftir því að þessi síða verði tekin niður.“