Bankar hækka vexti hver á fætur öðrum

Viktor Örn Ásgeirsson skrifar 1. apríl 2023 11:00

Landsbankinn hagnaðist um sautján milljarða í fyrra. Vísir/Vilhelm

Landsbankinn hefur breytt vöxtum vegna stýrivaxtahækkunar Seðlabanka Íslands. Sem dæmi hafa breytilegir vextir á óverðtryggðum íbúðalánum hækkað um eitt prósent og standa nú í níu prósentum. Arion banki gerði slíkt hið sama í vikunni.

Breytingar Landsbankans taka gildi strax í dag. Í tilkynningu frá bankanum segir að vaxtabreytingarnar taki mið af vöxtum á markaði og öðrum fjármögnunarkjörum Landsbankans.

Lántakar finna væntanlega fyrir breytingum á útlánavöxtum en eins og fyrr segir standa breytilegir vextir á óverðtryggðum íbúðalánum í níu prósentum. Breytilegir vextir óverðtryggðra íbúðalána hækka um 0,25 prósentustig og kjörvextir á óverðtryggðum lánum og yfirdráttarlánum hækka um eitt prósentustig.

Breytingarnar eru eftirfarandi:

Innlánavextir

Vextir á óverðtryggðum sparireikningum hækka um 1,0 prósentustig.
Viðskiptavinir fá 7,00% vexti þegar þeir spara í appinu.
Vextir á óverðtryggðum Fasteignagrunni verða 7,65%.
Vextir á Kjörbók hækka um 1,00 prósentustig.
Vextir almennra veltureikninga fyrirtækja hækka um 0,75 prósentustig.
Vextir á verðtryggðum sparireikningum hækka um 0,25 prósentustig.

Útlánavextir

Breytilegir vextir á óverðtryggðum íbúðalánum hækka um 1,00 prósentustig og verða 9,00%.
Breytilegir vextir verðtryggðra íbúðalána hækka um 0,25 prósentustig.
Fastir vextir nýrra óverðtryggðra íbúðalána til 36 mánaða hækka um 0,50 prósentustig og fastir vextir nýrra óverðtryggðra íbúðalána til 60 mánaða hækka um 0,20 prósentustig.
Fastir vextir nýrra verðtryggðra íbúðalána til 60 mánaða hækka um 0,20 prósentustig.
Kjörvextir á óverðtryggðum lánum og yfirdráttarlánum hækka um 1,00 prósentustig.
Verðtryggðir kjörvextir hækka um 0,25 prósentustig.

Arion banki breytti vöxtum einnig í vikunni. Óverðtryggðir fastir þriggja ára íbúðavextir haldast í 9,2 prósentum en óverðtryggðir breytilegir íbúðalánavextir hækka um eitt prósentustig og verða 9,34 prósent. Yfirdráttavextir og vextir greiðsludreifinga hækka um eitt prósentustig.

Landsbankinn Íslenskir bankar Fjármál heimilisins

Tengdar fréttir

„Getum ekki beðið eftir neinum öðrum“

Ásgeir Jónsson, seðlabankastjóri, segir augljóst að peningastefnunefnd Seðlabankans hafi ákveðið að stíga stórt skref til þess að ná tökum á verðbólgunni með því að hækka stýrivexti um eitt prósentustig. Hann segir hjálp við það verkefni úr öðrum áttum vel þegna en Seðlabankinn geti ekki beðið eftir að aðrir grípi til aðgerða.

22. mars 2023 10:42

Seðlabankinn hækkar enn stýrivexti og nú um heila prósentu

Peningastefnunefnd Seðlabanka Íslands hefur ákveðið að hækka vexti bankans um eina prósentu. Meginvextir bankans, vextir á sjö daga bundnum innlánum, fara því úr 6,5 prósentum í 7,5.

22. mars 2023 08:31

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.