Neytendur

Vill skatt­kerfis­breytingu og hús­næðis­stuðning til að spyrna við stýri­vaxta­hækkun

Hallgerður Kolbrún E. Jónsdóttir skrifar
Kristján Þórður Snæbjarnarson forseti ASÍ segir hvalrekaskatt eina þeirra aðgerða sem mætti grípa til.
Kristján Þórður Snæbjarnarson forseti ASÍ segir hvalrekaskatt eina þeirra aðgerða sem mætti grípa til. Vísir/Sigurjón

Forseti Alþýðusambandsins segir stjórnvöld þurfa að grípa inn í vegna stýrivaxtahækkana og koma almenningi til hjálpar. Dæmi eru um að afborganir af húsnæðislánum hafi hækkað um hundrað þúsund krónur á mánuði undanfarið árið.

Stýrivaxtahækkanir hafa lagst þyngst á þá sem eru með óverðtryggð lán á breytilegum vöxtum. Magnús Sigurjón Olsen Guðmundsson sem skrifaði á Twitter í morgun að afborganir af slíku húsnæðisláni hans hafi hækkað úr 160 þúsund krónum á mánuði í 260 þúsund krónur á einu og hálfu ári.

„Þetta er að lenda á okkar fólki. Það er mikil aukning í útgjöldum heimilanna sem við þurfum að bregðast við. Það þarf að finna leiðir til að verja stöðu heimilanna,“ segir Kristján Þórður Snæbjarnarson, forseti Alþýðusambands Íslands.

Grípa þurfi til sértækra aðgerða fyrir viðkvæmustu hópana: þá sem eru nýir á fasteignamarkaði, fólk á leigumarkaði og tekjulág heimili.

„Með húsnæðisstuðningi, barnabótum, með slíkum greiðslum til að létta undir þessum hópi og það er jafnvel hægt að beita skattkerfisbreytingum til að létta undir.“

Fyrirtæki og opinberir aðilar þurfi að draga inn seglin

Seðlabankinn beindi því til fyrirtækja í morgun að hætta að fjárfesta jafn mikið og þau hafa gert undanfarið. Hann tekur undir það.

„Til að slá á þenslu þá er það ekki fólkið með lægstu launin sem er að valda þenslunni sökum þess að fólk hefur ekki svigrúm til þess. Það er að kaupa nauðsynjar en lítið annað. Þarna eru fyrirtæki og opinberir aðilar sem þurfa að taka þetta til sín til að berjast gegn þeirri þenslu sem er á markaði,“ segir Kristján. 

Þá birtu Samtök atvinnulífsins í dag yfirlýsingu þess efnis að hið opinbera verði að leggja Seðlabankanum lið. Von er á fjármálaáætlun á næstunni og segja SA að þar geti stjórnvöld lagt þung lóð á vogarskálarnar gegn verðbólgunni með aðhaldssamri stefnu. Kristján tekur undir þetta og nefnir þar sérstaklega skatta á eignamikla.

Þú myndir vilja sjá hvalrekaskatt?

„Já, ég held það sé bara mjög mikilvægt fyrir samfélagið að líta til þess að fjármagnið þar sem það er til og nota til að styðja við fólkið í landinu.“

Neytendur Seðlabankinn Verðlag ASÍ

Tengdar fréttir

„Er ekki kominn tími á að ríkis­stjórnin skili lyklunum að Stjórnar­ráðinu?“

Tólfta stýrivaxtahækkun Seðlabankans í röð hefur vakið hörð viðbrögð víða í samfélaginu en þingmenn vöktu margir hverjir athygli á aðgerðarleysi ríkisstjórnarinnar á Alþingi í dag. Þingmaður Samfylkingarinnar segir ríkisstjórnina kjarklausa og verkstola og þingflokksformaður Viðreisnar segir þau ekki geta dvalið lengur í Hvergilandi. 

Seðla­bankinn slátri á­vinningi kjara­samninga

Formaður Starfsgreinasambandsins og forseti Alþýðusambands Íslands og eru báðir ósáttir með enn eina vaxtahækkunina sem tilkynnt var um í dag. Þeir segja báðir að afleiðingar vaxtahækkana bitni helst á því fólki sem má síst við þeim.

Seðl­a­bank­a­stjór­i: Fók­us­inn far­inn af heim­il­um yfir á fyr­ir­tæk­i

Fasteignamarkaðurinn leggur ekki jafn mikið til verðbólgu og hann gerði. Verðbólga er nú á afar breiðum grunni, til að mynda vegna aukins kostnaðar vegna nýafstaðna kjarasamninga. „Fókusinn er að fara af heimilum yfir á fyrirtæki,“ sagði seðlabankastjóri. Aðstoðarseðlabankastjóri sagði að innlend eftirspurn væri „miklu sterkari en við gerðum ráð fyrir“ meðal annars vegna fjárfestingu atvinnuvega.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið