Neytendur

Bensínið gæti klárast á fimmtu­dag

Sigurður Orri Kristjánsson skrifar
Þórður segir birgðartanka fyrirtækisins vera fulla. 
Þórður segir birgðartanka fyrirtækisins vera fulla.  Vísir/Steingrímur Dúi

Forstjóri Skeljungs segir að bensín bensínstöðva gæti klárast strax á fimmtudag ef af verkfalli olíubílstjóra verður á miðvikudag, eins og virðist stefna í. Hann hefur þungar áhyggjur af stöðunni, alvarlegt ástand geti skapast á örfáum dögum.

Enn þokast ekkert í kjaradeilu Eflingar og Samtaka atvinnulífsins en verkföll olíubílstjóra, starfsmanna Beraya hótela og starfsmanna Edition hótelsins eru handan við hornið.

Að öllu óbreyttu hefjast verkföll á miðvikudag en þá gengur ansi hratt á birgðir olíufélaganna.

Þórður Guðjónsson forstjóri Skeljungs hefur talsverðar áhyggjur af stöðunni en undirbúningur fyrir verkfallið hefur staðið yfir frá því að atkvæðagreiðslan um verkfallsboðunina fór fram.

„Þetta er áhyggjuefni því Ísland er olíuháð og það er nokkuð ljóst að þetta mun bíta ansi harkalega í okkur hérna á Íslandi ef af verður. Frá því að tilkynnt var að verkfall væri fyrirhugað frá og með hádegi á miðvikudaginn 15. febrúar. Þá fórum við að keyra allt upp og fylla á alla birgðatanka sem hægt er að fylla á.“

Það tekur ekki marga daga að tæma eina bensínstöð, jafnvel stóra eins og stöð Orkunnar á Vesturlandsvegi.

„Þessi væntanlega tæmist á degi tvö eftir að verkfall skellur á þannig að svona upp undir kvöld á fimmtudegi gæti þessi stöð farið að tæmast.“

Áhrifin gætu verið margvísleg en til að mynda vöruflutningar og ferðaþjónusta munu líða fyrir olíuskortinn. Það er þó ýmis starfsemi sem þarf að vera undanþegin verkfallinu.

„Til dæmis lögreglan, sjúkrabílar, slökkviliðið, björgunarsveitirnar okkar, þeir sem sjá um hálkuvarnir, snjóruðninga, sjúkrahúsin, varaaflsstöðvar og guð má vita hvað, þetta er allt þarna úti.“





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×