Endurreikna lán og hafa samband staðfesti æðri dómstólar dóminn

Kolbeinn Tumi Daðason skrifar 8. febrúar 2023 14:41

Lilja Björk Einarsdóttir er bankastjóri Landsbankans. Vísir/Vilhelm

Landsbankinn reiknar líkt og Neytendasamtökin með að áfrýja dómi þess efnis að bankinn skuli greiða hjónum tvö hundruð þúsund krónur vegna oftekinna vaxta af láni með breytilegum vöxtum. Komist æðri dómstólar að sömu niðurstöðu ætlar bankinn að eiga frumkvæði að því að endurreikna öll lán sem falli undir fordæmið.

Þetta kemur fram í tilkynningu frá Landsbankanum. Héraðsdómur Reykjavíkur kvað í gær upp dóm í máli sem varðar vaxtabreytingarákvæði í neytendalánum Landsbankans.

„Í kjölfar setningar nýrra laga um neytendalán árið 2013 voru gerðar breytingar á ákvæðinu og falla neytendalán sem tekin voru hjá Landsbankanum eftir þann tíma því ekki undir dóminn,“ segir í tilkynningu frá bankanum.

„Gert er ráð fyrir að dómnum verði áfrýjað og því liggur endanleg niðurstaða ekki fyrir. Fari svo að lokaniðurstaða dómstóla verði sú að viðskiptavinir eigi rétt á endurgreiðslu vegna óljósra vaxtaskilmála neytendalána mun bankinn eiga frumkvæði að því að endurreikna önnur lán sem falla undir slíkt fordæmi og hafa samband við viðskiptavini.“

Landsbankanum var gert að endurgreiða oftekna vexti að upphæð ríflega 200 þúsund. Í dómi héraðsdóms kom fram að fjárhæðir sem hjónin hefðu átt rétt á fyrir 8. desember 2017 væru fyrndar.

Breki Karlsson, formaður Neytendasamtakanna tjáði fréttastofu í gær að samtökin væru ósammála útreikningi héraðsdóms á endurgreiðslum.

„Upphaflegu vextirnir látnir halda sér og við erum ekki sammála því. Að okkar mati er útreikningurinn byggður á röngum forsendum. Dómari gefur sér að neytendur eigi að greiða sömu vexti og þegar lánið var tekið, við teljum það ekki. Það eru fordræmi fyrir því að vextir Seðlabankans hafi verið notaðir,“ sagði Breki.

Íslenskir bankar Dómsmál Landsbankinn

Tengdar fréttir

Landsbankinn tapaði máli sem gæti varðað um 70 þúsund lán

Landsbankanum hefur verið gert að greiða hjónum um 200 þúsund krónur vegna oftekinna vaxta af láni með breytilegum vöxtum. Málið var rekið fyrir héraðsdómi með stuðningi Neytendasamtaka sem telja að um 70 þúsund sambærileg lán hafi verið tekin á undanförnum árum. Komist var að öndverðri niðurstöðu í sambærilegu máli gegn Arion banka.

7. febrúar 2023 18:54

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.