Ofvirkur ofurefli við að etja

Leikurinn fór fram í Nuke, en þegar liðin mættust þar fyrr á tímabilinu beið TEN5ION afhroð, tapaði 16–0 fyrir Ármanni.

TEN5ION vann hnífalotuna og kaus að byrja í vörn, en Brnr bjargaði skammbyssulotunni fyrir horn fyrir Ármann sem misst hafði marga menn í sókninni. Hundzi og Vargur kræktu í tvær fellur hvor í næstu lotu. Þrefaldar fellur Hundza og Ofvirks gerðu út um næstu lotur til viðbótar þar sem TEN5ION tók sér slæmar stöður og passaði ekki upp á fjárhaginn. Jafnvel þótt TEN5ION væru fyrri til að fella andstæðinga dugði það þeim skammt, Ármann felldi þá til baka af krafti þar sem Brnr og Ofvirkur stóðu sig virkilega vel og af fyrstu átta lotunum vann TEN5ION aðeins eina. 

Þá snerist gæfan aðeins TEN5ION í hag þar sem liðið vann góða lotu illa vopnaðir og tókst í kjölfarið að minnka muninn í 7–4 fyrir Ármanni. Ármann spýtti þá í lófana á ný og vann það sem eftir var hálfleiks fyrir utan síðustu lotuna.unaði þar ekki minnst um fjórfalda fellu frá Brnr en nóg var að taka af margföldum fellum Ármanns megin

Staðan í hálfleik: TEN5ION 5 – 10 Ármann

Útlit var fyrir að TEN5ION tækist að vinna fyrstu lotuna eftir góðar opnanir frá Sveittum en Ofvirkur og Brnr sneru vörn í sókn og kræktu í stigið fyrir Ármann.  Þeir félagar áttu stórleik í næstu lotum, hittu gríðarlega vel og beittu búnaði af mikilli list til að tryggja Ármanni hverja lotuna á fætur annarri og byggja upp góðan banka. Hundzi og Hyper létu sitt ekki eftir liggja og skipti litlu máli að Vargur hitti nánast ekki neitt. Einu björtu punktar í leik TEN5ION voru sparloturnar í fyrri hálfleik en ekki komst liðið á blað í þeim síðari.

Lokastaða: TEN5ION 5 – 16 Ármann

Sigur Ármanns tryggir stöðu liðsins í fjórða sætinu þegar aðeins ein umferð er eftir. Tap TEN5ION setur svo pressu á Fylki að vinna sína leiki til að enda ekki í neðsta sætinu.

Næstu leikir:

• FH – Ármann, fimmtudaginn 16/2 kl. 19:30
• TEN5ION – Atlantic, fimmtudaginn 16/2 kl. 20:30

Sýnt verður frá leikjunum í beinni á Stöð 2 Esport og á Twitch síðu Rafíþróttasamtaka Íslands.