Sögu Irma-verslana í Dan­mörku að ljúka

Þetta kemur fram í tilkynningu frá danska matvörurisanum Coop. Í nýju skipulagi mun Coop reka verslanir undir þremur merkjum í stað átta – Coop/coop.dk, 365discount og Brugsen.

Til þessa hefur risinn rekið verslanir undir merkjum Kvickly, SuperBrugsen, Dagli´Brugsen, Fakta, 365discount, Irma, Coop.dk Shopping og Coop.dk MAD.

Fram kemur að með breytingunni verði til stærsta matvörukeðjan í Danmörku, Coop, og að markmiðið sé að tryggja Dönum betri og ódýrari matvöru.

Nafni verslana sem nú ganga undir nafninu Dagli`Brugsen verður breytt í Brugsen. Varðandi vörumerkið Irma þá segir í tilkynningunni að vörur verði enn framleiddar undir merkjum Irma sem fáanlegar verða í Coop.

Sögu þeirra 65 Irma-verslana sem reknar eru í Danmörku mun hins vegar ljúka og verður nafni þeirra níu stærstu breytt í Coop, nafni 28 þeirra verður breytt í 365discount og nafni ellefu þeirra verður breytt í Brugsen. Sautján verslunum, sem nú eru reknar undir merkjum Irma, verður lokað.