Viðskipti innlent

Sverrir Einar skuldar Landsbankanum tæpar 60 milljónir vegna Þrastalundar

Jakob Bjarnar skrifar
Sverrir Einar hefur víða látið til sín taka í viðskiptalífinu svo sem í fasteignaviðskiptum og kaupum á gulli.  Veitingareksturinn hefur hins vegar reynst honum erfiður þó hann leggði sig allan fram.
Sverrir Einar hefur víða látið til sín taka í viðskiptalífinu svo sem í fasteignaviðskiptum og kaupum á gulli.  Veitingareksturinn hefur hins vegar reynst honum erfiður þó hann leggði sig allan fram. vísir

Landsbankinn hefur lagt inn beiðni um nauðungarsölu á hinum fornfræga Þrastalundi í Grímsnesi. Eignin er skráð á V63 ehf. sem er alfarið í eigu Sverris Einars Eiríkssonar athafnamanns.

Þetta kemur fram í Lögbirtingarblaðinu, að gerðarbeiðandi nauðungarsölu Þrastalunds sé Landsbankinn hf og að upphæð krafna sé krónur 59.166.452. Þar segir að um sé að ræða fasteign að Þrastalundi lóð 1 í Grímsnes- og Grafningshreppi, þar sem veitingastaðurinn Þrastalundur er til húsa.

Sverrir Einar hefur áður komið við sögu í fjölmiðlum fyrir vafasama fjármálagjörninga. Vísir greindi frá því fyrir ári að hann hafi verið ákærður fyrir skattalagabrot og peningaþvætti.

Sverrir Einar sendi við það tækifæri frá sér yfirlýsingu þar sem segir að hann hafi í nærri aldarfjórðung stundað ýmis konar viðskipti, þó mest fasteignaviðskipti hér á landi og í Bretlandi. Þá hafi hann komið að kaupum á gulli og demöntum, stundað lánastarfsemi, veitinga- og gistihúsarekstur, starfsmannaleigu og fleira.

„Flest hefur gengið vel en vissulega hefur ekki allur rekstur gengið upp með þeim hætti sem lagt var upp með í byrjun, og er það miður. Þau félög sem um ræðir héldu utan um starfsemi á sviði veitingareksturs. Því miður var sá rekstur erfiður og gekk ekki upp, þrátt fyrir að ég legði mig allan fram þá varð ég að játa mig sigraðan að lokum. Því fór sem fór með þau félög.“

Viðskiptablaðið fjallaði um nauðungarsöluna á Þrastalundi í morgun og þar segir að V63 hafi ekki skilað inn ársreikningi frá árinu 2015.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×