Musk hyggst hætta þegar arf­takinn er fundinn

Musk greindi frá þessu í nótt. Tilkynningin kemur í kjölfar skoðanakönnunar á Twitterreikningi hans þar sem hann spurði notendur hvort hann ætti að hætta sem forstjóri. Mikið hefur gustað um Twitter frá því að Musk keypti félagið í október.

Rúmlega 57 prósent þeirra sem þátt tóku í könnuninni greiddu atkvæði með því að Musk ætti að láta af störfum. Hann hafði heitið því að fara eftir niðurstöðunni, hver sem hún yrði.

Musk segist nú áfram munu stýra hugbúnaðar- og netþjónateymi félagsins þegar nýr forstjóri hefur verið ráðinn.

Frá því að Musk keypti Twitter í haust hefur hann látið reka um helming starfsfólksins og reynt að selja áskriftarþjónustu þar sem notendur greiða átta eða ellefu Bandaríkjadali fyrir blátt merki á reikningum sínum. Felur merkið í sér að starfsmenn Twitter hafa þá gengist úr skugga um að viðkomandi reikningur sé ósvikinn reikningur viðkomandi. Twitter hefur lengi glímt við, líkt og aðrir samfélagsmiðlar, að notendur þykjast margir vera aðrir en þeir raunverulega eru.

Félagasamtök hafa sömuleiðis gagnrýnt nýlegar stefnubreytingar Twitter og saka Musk um að gera breytingar á notkunarskilmálum sem munu fela í sér aukna hatursorðræðu og upplýsingaóreiðu.

Musk hefur einnig sætt gagnrýni fyrir að hafa lokað á reikninga blaðamanna sem hafa fjallað um samfélagsmiðla og málefni þeim tengdum.

Nefndir til sögunnar sem mögulegir arftakar

Í frétt BBC segir að einhverjir hafi velt því upp hvort að Jack Dorsey, stofnandi Twitter, verði fenginn til að snúa aftur í forstjórastólinn. Dorsey hætti sem forstjóri í nóvember 2021. 

Önnur nöfn sem hafa verið nefnd til sögunnar eru Sheryl Sandberg, fyrrverandi rekstrarstjóri Facebook, Sriram Krishnan, verkfræðingur og náinn samstarfsmaður Musks, og Jared Kushner, tengdasonur Donald Trump Bandaríkjaforseta og fyrrverandi ráðgjafi forsetans.

„Enginn vill starfið sem getur raunverulega haldið lífi í Twitter,“ sagði Musk í kjölfar niðurstöðu könnunarinnar.