Innlent

Leigusalar hirði hækkun húsnæðisbóta ef engin er leigubremsan

Margrét Helga Erlingsdóttir skrifar
Kristrún Frostadóttir tók við formennsku í Samfylkingunni í haust.
Kristrún Frostadóttir tók við formennsku í Samfylkingunni í haust. Vísir/Vilhelm

Kristrún Frostadóttir, formaður Samfylkingarinnar, gagnrýnir að í aðgerðapakka ríkisstjórnarinnar vegna kjarasamninga sé ekki að finna leigubremsu. Hækkun bóta og húsnæðisstuðningur muni einfaldlega renna til fjármagnseigenda ef leigubremsa er ekki innleidd á sama tíma.

Í gær kynntu þrír ráðherrar ríkisstjórnarinnar þær aðgerðir sem ráðist verður í vegna kjarasamninga. Í pakkanum er að finna kerfisbreytingar á barnabótakerfinu sem verður einfaldað til muna. Kerfið mun ná til fleiri fjölskyldna og verða greiddar út fyrr en verið hefur. Þá munu húsnæðisbætur leigjenda hækka um 13,8% í upphafi næsta árs auk þess sem skerðingarmörk húsnæðisbóta hækka um 7,4%. Stjórnvöld segjast ætla að leggja áherslu á fjölgun íbúða og uppbyggingu í almenna íbúðakerfinu.

Nánar er hægt að lesa um aðgerðapakka ríkisstjórnarinnar hér.

Kristrún Frostadóttir, formaður Samfylkingarinnar, segist í hádegisfréttum Bylgjunnra fagna því að ríkisstjórnin hafi tekið mið af hluta af þeim tillögum sem hennar flokkur lagði fram í síðustu viku.

„Ég vil hins vegar gera athugasemdir við að það er ennþá niðurskurður í nýjum fjárheimildum til þess að byggja óhagnaðardrifið húsnæði og það skortir líka þá leigubremsu sem við höfum talað fyrir og töluðum meðal annars fyrir í kjarapakkanum okkar sem kemur í veg fyrir að hækkun þessara bóta fari að öllu leyti bara áfram til leigusala,“ útskýrir Kristrún.

Mikil umræða hefur skapast á undanförnum vikum um þrönga stöðu leigjenda og kallaði verkalýðshreyfingin eftir leigubremsu. Katrín Jakobsdóttir, forsætisráðherra, sagði á kynningarfundinum í gær að hreyfingin fengi aðild að starfshópi um stöðu leigjenda og húsnæðismarkaðinn.

Fjármálaráðherra sagði í gær að heildarfjárhæð barnabóta verði fimm milljörðum hærri en í núverandi kerfi með breytingunum. Kristrún segir þetta algert lágmarksviðbragð við slæmri stöðu í velferðarmálum.

„Staðreyndin er auðvitað sú að við erum langt á eftir hinum Norðurlöndunum þegar kemur að barnabótum og þar er horft á þær sem eðlilegar greiðslur handa fólki sem er með börn á framfæri. Í dag er þetta svona hálfpartinn fátæktarstyrkur þannig að við fögnum auðvitað því að það eigi að taka skref í rétta átt hvað þetta varðar.“

Samfylkingin fagni öllum áfangasigrum.

„En það breytir því ekki að núna er ríkisstjórnin auðvitað að stíga inn í neyð sem hún hefur sjálf skapað og við hefðum vilja sjá þessi úrræði koma upphaflega inn í fjármálaáætlun í vor, fjárlög í haust en í staðinn erum við í þessum leiðréttingum rétt fyrir jól og rétt fyrir kjarasamninga. Auðvitað er gott að redda sér fyrir horn þegar þessi staða er komin upp en svona er auðvitað ekki hægt að stjórna landinu til langs tíma, við verðum að vera með einhverja langtímastefnumótun.“

Hádegisfréttir Bylgjunnar Samfylkingin Kjaramál Kjaraviðræður 2022

Tengdar fréttir

Hvar er kjara­pakkinn, Katrín?

Við sem viljum stjórna í þágu almennings gerum kröfu um framfarir. Í staðinn verðum við vitni að stjórnarháttum sem festa kerfin okkar enn frekar í hjólförunum. Stjórnarháttum sem fela í sér að neyð er sköpuð til þess eins að valdhafar geti hlaupið inn líkt og bjargvættir rétt fyrir jól til að stoppa í götin. Með þessum stjórnarháttum komumst við einfaldlega ekkert áfram.

Segja óhóflegar hækkanir óásættanlegar og vilja leiguþak

Þingmenn Flokks Fólksins, Samfylkingar og Vinstri grænna eru sammála um að setja þurfi á leiguþak eða grípa til sambærilegra aðgerða til að bregðast við stöðunni á leigumarkaði. Þingmaður Vinstri grænna á von á að hugað verði að því á næstunni. Þingmaður Samfylkingarinnar segir ríkisstjórnina hafa getað komið í veg fyrir stöðuna en þau hafi svikið loforð um leigubremsu. 

Fleiri fá barnabætur og húsnæðisbætur hækka

Stjórnvöld kynntu á blaðamannafundi á þriðja tímanum aðgerðir sem ráðist verður í vegna kjarasamninga á almennum vinnumarkaði. Gerðar verða kerfisbreytingar á barnabótakerfinu og það einfaldað til muna. Húsnæðisbætur leigjenda hækka um 13,8% í upphafi næsta árs auk þess sem tekjuskerðingarmörk húsnæðisbóta hækka um 7,4%.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið