Fótbolti

Karólína Lea farin að æfa á ný

Hjörtur Leó Guðjónsson skrifar
Karólína Lea Vilhjálmsdóttir er að jafna sig af löngum meiðslum.
Karólína Lea Vilhjálmsdóttir er að jafna sig af löngum meiðslum. VÍSIR/HULDA MARGRÉT

Landsliðskonan Karólína Lea Vilhjálmsdóttir virðist loksins vera að ná sér af löngum meiðslum og er farin að æfa með félagsliði sínu, þýska stórveldinu Bayern München, á nýjan leik.

Karólína lék síðast knattspyrnu er íslenska kvennalandsliðið lék á Evrópumótinu í sumar. Hún var einn besti leikmaður liðsins á mótinu, en Þorsteinn Halldórsson, þjálfari íslenska liðsins, sagði að Karólína hafi í raun verið meidd á meðan mótinu stóð. Raunar hafði hún verið að glíma við meiðsli aftan í læri í langan tíma fyrir mótið.

Karólína missti því af mikilvægum leikjum Íslands um sæti á HM. Íslenska liðið var grátlega nálægt því að tryggja sér sæti á HM í fyrsta skipti í sögunni, en þurfti að sætta sig við tap gegn Hollendingum í undankeppninni og svo tap gegn Portúgal í umspilinu.

Karólína hefur því ekki leikið knattspyrnu síðan í júlí fyrr á þessu ári. Hún er þó loksins farin að æfa með félagsliði sínu á ný og mun það klárlega hjálpa stórliðinu Bayern München í toppbaráttunni að fá Karólínu aftur í hópinn. 

Næsti leikur Bayern er á morgun er liðið mætir Bayer Leverkusen í þýsku úrvalsdeildinni áður en liðið fer til Noregs og mætir Rosengård í Meistaradeildinni.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.