Sektar Fiskikónginn fyrir að fara ekki að fyrirmælum

Atli Ísleifsson skrifar 9. desember 2022 14:24

Kristján Berg Ásgeirsson rekur Fiskikónginn og heitirpottar.is. Vísir/Vilhelm

Neytendastofa hefur sektað Fiskikónginn um 50 þúsund krónur fyrir að hafa ekki fylgt fyrirmælum stofnunarinnar um verðmerkingar á síðunni heitirpottar.is með fullnægjandi hætti.

Neytendastofa tók málið til skoðunar eftir að ábending barst vegna skorts á verðupplýsingum um heita potta. Vefsíðan heitirpottar.is er rekin er af Fiskikóngnum ehf.

Fram kemur að undir meðferð málsins hafi verið bætt við verðmerkingum á margar vörur á vefsíðunni en þrátt fyrir ítrekanir Neytendastofu hafi ekki bætt við verðmerkingum á yfirlitssíður.

Eingöngu hafi verið tilgreint „verð frá“ þar sem hægt væri að velja mismunandi útgáfur af sömu vöru.

„Í ljósi þess að Fiskikóngurinn ehf., eigandi vefsíðunnar heitirpottar.is, fylgdi ekki fyrirmælum Neytendastofu með fullnægjandi hætti innan tilskilins frests hefur stofnunin nú lagt 50.000 kr. stjórnvaldssekt á verslunina,“ segir í ákvörðun Neytendastofu.

Áfram er því beint til Fiskikóngsins að koma verðupplýsingum á vefsíðu sinni, heitirpottar.is, í rétt horf innan tveggja vikna frá dagsetningu ákvörðunarinnar.

Auglýsinga- og markaðsmál Neytendur

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.