Neytendur

Bjór fyrir átta þúsund krónur í tuttugu þúsund króna daga­tali

Bjarki Sigurðsson skrifar
Jólabjóradagatalið og bjórarnir sem Jón Bjarni fékk í sínu dagatali.
Jólabjóradagatalið og bjórarnir sem Jón Bjarni fékk í sínu dagatali.

Bjór sem viðskiptavinur Nýju vínbúðarinnar fékk í jóladagatali verslunarinnar kostar rúmlega helmingi minna ef hann hefði verið keyptur í stykkjatali. Einungis helmingur bjórsins var jólabjór og var restin með ódýrari bjór landsins.

Jón Bjarni Óskarsson keypti sér Jólabjóradagatal Nýju vínbúðarinnar en varð fyrir miklum vonbrigðum þegar hann uppgötvaði fyrir slysni hvaða bjórtegundir voru í dagatalinu hans. 

Dagatalið kostar 19.800 krónur og inniheldur 24 bjórtegundir, einn bjór fyrir hvern dag í desember fram að jólum. Meðalverð hvers bjórs er því 825 krónur. Á vef Nýju vínbúðarinnar er dagatalinu gefnar fimm stjörnur og sagt frá því hve fjölbreytt úrval af jólabjór sé í boði. Þá er birtur listi með 39 jólabjórstegundum sem viðskiptavinir gætu fengið í dagatalinu, en tekið fram að listinn sé ekki tæmandi og að sjálfsögðu komist ekki allar tegundirnar fyrir í einu dagatali. 

Víking gylltur fyrsti bjórinn

Dagatalið sjálft er síðan pappakassi með spjöldum inni í sem skilja bjórdósirnar að. Þegar Jón Bjarni opnaði fyrsta gluggann dró hann út varð hann fyrir afar miklum vonbrigðum. 

„Fyrsta desember opna ég fyrsta gluggann og þá tek ég bjórinn út og sé að það er Víking gylltur, sem er ekki jólabjór. Þá hrynja allir bjórarnir fyrir ofan fyrsta bjórinn niður. Þetta er mjög illa hannað. Bjórinn sem hrundi niður beint fyrir framan glugga númer eitt var Víking Lite Lime sem er ójólalegasti bjór sem ég get ímyndað mér,“ segir Jón Bjarni í samtali við fréttastofu. 

Jón Bjarni bjóst ekki við því að einungis helmingur bjóranna yrðu jólabjórar.

Eftir að hafa séð tvo afar ójólalega bjóra ákvað hann að rífa dagatalið upp til að sjá hvaða bjóra hann væri að fá. 

„Þá eru þetta tólf ódýrustu jólabjórarnir í ríkinu og svo tólf bjórar sem eru ekki einu sinni jólabjórar. Einhverjir svona sullbjórar sem maður kaupir þegar maður er að fara á Þjóðhátíð,“ segir Jón Bjarni.

Hefði sparað ellefu þúsund

Hann lagði saman verð allra bjóranna sem komu í dagatalinu hans. Miðað við verðlagningu ÁTVR er samanlagt verð bjóranna 8.529 krónur, eða rúmar 355 krónur stykkið. Hefði Jón Bjarni keypt alla bjórana sjálfur hefði hann sparað sér rúmar ellefu þúsund krónur. 

Heildarverðið var 8.529 krónur.

Það gekk erfiðlega fyrir Jón Bjarna og kærastann hans að fá svör og eftir þónokkur símtöl og tilraunir til að hafa samband í gegnum netspjall var fátt um svör. Einu upplýsingarnar sem hann hefur fengið er að hann geti prófað að senda póst á Nýju vínbúðina og reynt að fá endurgreitt. Hann segir þetta vera mikil vonbrigði. 

„Sérstaklega miðað við listann. Ég var að skoða nokkur dagatöl og valdi þetta því þetta átti mest við mig. Mér finnst þetta eiginlega vera vörusvik. Þetta heitir jólabjóradagatal á síðunni hjá þeim og svo er helmingurinn ekki einu sinni jólabjórar,“ segir Jón Bjarni. 

Verðlagning álitamál

Í svari við fyrirspurn fréttastofu segir Sverrir Einar Eiríksson, eigandi Nýju vínbúðarinnar að það sé misskilningur ef einhver hafi talið að allur bjórinn ætti að vera jólabjór. Hvergi komi fram að einungis sé um jólabjór að ræða. Aftur á móti kemur heldur hvergi skýrt fram að ekki sé einungis um jólabjór að ræða. Þá sé verðlagning varanna alltaf álitamál. 

„Þarna er líka kostnaður tengdur hönnun, gerð og áfyllingu dagatalanna, fyrir utan aðra þjónustu. Fólk greiðir ekki heldur kostnaðarverð fyrir bjór á veitingastöðum, fyrir utan að þetta er ekki sala á stökum bjórum, heldur jóladagatölum,“ segir Sverrir. 





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.