Viðskipti innlent

Byggja sjó­böð í Önundar­firði

Bjarki Sigurðsson skrifar
Svona líta teikningarnar sem kynntar voru íbúum á svæðinu út.
Svona líta teikningarnar sem kynntar voru íbúum á svæðinu út.

Til stendur að byggja sjóböð við Holtsfjöru í Önundarfirði á næstu misserum. Tillögur að byggingu þeirra voru kynntar íbúum á Flateyri og í Önundarfirði nú á dögunum. 

Sjóböðin verða byggð af eignarhaldsfélaginu Blævængi ehf. í samstarfi við verkfræðistofuna Eflu og arkitektúrstofuna Sen&Son. Næstu skref í þróun verkefnisins eru náttúrufarsgreining og deiliskipulag svæðisins. 

„Böðin byggja á sjálfbærri nýtingu á varmaorku úr sjó, einstakri náttúrufegurð og þessari dásamlegu gullnu skeljasandsfjöru sem nú þegar er miðstöð sjóbaða á norðanverðum Vestfjörðum. Nálgun okkar er nærfærin á þann hátt að byggingin og böðin eru hönnuð inn í umhverfið og verða hluti af því,“ er haft eftir Runólfi Ágústssyni, verkefnastjóra verkefnisins, í tilkynningu. 

Pottar, laugar, gufuböð og fleira verða á svæðinu.

Tvær bryggjur munu liggja frá lauginni um fjöruna í sjóinn. Annars vegar verður stígur tengdur stuttri flotbryggju og hinsvegar ný löng trébryggja út í fjörðinn þar sem gestir geta farið í stóran heitan pott á bryggjusporðinum. 

Til að hita upp sturtur, laug og potta hefur Efla unnið tillögur á því að vinna varmaorku úr sjónum. Sjávarhitinn verður nýttur sem orkugjafi og sjónum dælt um sérstaka varmadælu. Í tilkynningunni segir að verkefnið feli því í sér nýsköpun hvað varðar orkuvinnslu á köldum svæðum. 

Ásamt laugum, pottum og baðströndinni verða veitingastaður, gufuböð, snyrti- og nuddstofa. Verkefnið er styrkt af Þróunarsjóði Flateyrar og verður markaðssett undir heitinu Hvítisandur sem er gamalt örnefni fyrir svæðið. 

vísir




Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.