Neytendur

Nóvember undir­lagður af­sláttar­gylli­boðum og neyslu­fylleríi

Hallgerður Kolbrún E. Jónsdóttir skrifar
Birgitta hvetur fólk til að vera meðvitaðra í neyslunni, hugsa sig um og kaupa aðeins það sem það vanti.
Birgitta hvetur fólk til að vera meðvitaðra í neyslunni, hugsa sig um og kaupa aðeins það sem það vanti. Vísir/Ívar Fannar

Mikil tilboðshelgi er gengin í garð og segja verslunarmenn nóvembermánuð nánast undirlagðan tilboðsdögum. Sérfræðingur hjá Umhverfisstofnun telur tilboðsdagana óþarfaneyslufyllerí.

Pálmi Jónsson, forstjóri Heimkaupa, segir hundruði pantana hafa streymt inn hjá versluninni í dag.Vísir/Ívar Fannar

Mikill tilboðsdagur var í gær og raunar mikil tilboðshelgi sem hefur fest sig í sessi á undanförnum árum.

Flestar íslenskar verlsanir hafa tekið upp þennan ameríska tilboðsdag, sem kallast Svörtudagur á íslensku, sem líklega hefur ekki farið fram hjá neinum. 

Samkvæmt upplýsingum frá neytendasamtökunum hafa þegar borist tugir tilkynninga um að verslanir hafi hækkað verð í aðdraganda tilboðsdaganna til þess að tilboðsverð yrðu sem hæst.

Sjáiði að fólk sé að nýta þessi tilboð í jólainnkaup?

„Já, við sjáum bara að nóvember er að verða stærri og stærri. Þetta er ekki lengur einn dagur, þetta er næstum orðinn samfeldur mánuður,“ segir Pálmi Jónsson, forstjóri Heimkaupa. 

Og þó margir neytendur fagni tilboðsdögum sem þessum eru ekki allir jafn ánægðir með afsláttardaga og auglýsingaflóð sem þetta.

„[Auglýsingar] ýfa upp í okkur kauplöngun, oftar en ekki í óþarfa. Og okkur líður eins og við séum að missa af ef við tökum ekki þátt. Sérstaklega eins og núna í nóvember, sem hefur verið undirlagður auglýsingum og afsláttargylliboðum, þá magnast upp einhver spenna í manni og manni finnst eins og maður þurfi að taka þátt en maður veit ekki einu sinni hvað mann vantar eða langar,“ segir Birgitta Steingrímsdóttir, sérfræðingur á sviði hringrásarhagkerfis hjá Umhverfisstofnun. 

Flesta vanti ekkert og því tilvalið að gefa gæðastundir, upplifanir eða endurnýttar gjafir. Einhverjar samfélagslegar breytingar þurfi til að þessi neyslumenning breytist.

„Það er orðið svo samfélagslega samþykkt að taka þátt í neyslufylleríinu og þá er bara mikilvægt að staldra aðeins við og leyfa auglýsingunum að fljóta hjá og nýta tímann í eitthvað annað.“





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.