Viðskipti erlent

Ætlar að fá annan til að stýra Twitter

Kjartan Kjartansson skrifar
Twitter virðist hafa átt hug Elons Musk allan upp á síðkastið. Hann segir að breyting verði brátt á því.
Twitter virðist hafa átt hug Elons Musk allan upp á síðkastið. Hann segir að breyting verði brátt á því. Vísir/EPA

Elon Musk, eigandi samfélagsmiðilsins Twitter, segist ætla að draga úr afskiptum sínum af miðlinum og fá einhvern annan til að stýra fyrirtækinu. Sá stutti tími sem Musk hefur átt Twitter hefur verið stormasamur svo vægt sé til orða tekið.

Gengið hefur á ýmsu frá því að Musk keypti Twitter fyrir 44 milljarða dollara fyrir skemmstu. Hann hefur rekið stóran hluta starfsmanna fyrirtækisins, boðað breytingar á miðlinum sem voru settar í loftið en dregnar til baka jafnharðan aftur og hæðst að fyrrverandi starfsmönnum og jafnvel þingmönnum og dreift samsæriskenningum.

Þegar Musk bar vitni í máli sem tengist launagreiðslum hans hjá rafbílafyrirtækinu Tesla sagðist hann búast við því að verja minni tíma í rekstur Twitter á næstunni og að hann vonaðist til þess að ljúka endurskipulagningu fyrirtækisins í þessari viku.

Twitter sendi starfsfólki tölvupóst seint í gærkvöldi þar sem því voru gerðir tveir kostir: sætta sig við mikla yfirvinnu við endurskipulagningu fyrirtækisins á næstunni eða taka poka sinn með biðlaunum.

Reuters-fréttastofan segir að fjárfestar í Teslu hafi vaxandi áhyggjur af því hversu miklum tíma Musk hefur varið í Twitter upp á síðkastið.

„Það er aragrúi verkefna í byrjun eftir kaup við að endurskipuleggja fyrirtækið en ég býst við því að draga úr viðveru minni hjá Twitter,“ sagði Musk fyrir dómi.

Viðurkenndi hann að nokkrir verkfræðingar frá Teslu aðstoðuðu nú við að fara yfir verkfræðingateymi Twitter. Það gerðu þeir sjálfviljugir og utan vinnutíma hjá Teslu.

Málið gegn Musk snýst um milljarða dollara greiðslur Teslu til hans. Fjárfestar í fyrirtækinu halda því fram að samningur fyrirtækisins við Musk byggist á að hann nái auðsóttum markmiðum sem stjórn sem sé honum undirgefin samþykkti.


Tengdar fréttir

Lengri vinnudagar hjá „harðara“ Twitter 2,0

Auðjöfurinn Elon Musk hefur gefið þeim starfsmönnum Twitter sem enn vinna hjá samfélagsmiðlafyrirtækinu frest út daginn á morgun til að sverja þess heit að skuldbinda sig til að vinna lengri vinnudaga hjá „harðara“ Twitter. Geri þau það ekki verði þeim sagt upp.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.