Sæti á HM, nístandi vonbrigði eða vító og vesen

Það verður dregið í riðla fyrir HM í næstu viku. Ef að Ísland vinnur Portúgal í kvöld, í venjulegum leiktíma eða framlengingu, verður liðið með í þeim drætti og tekur þátt í keppni þeirra bestu í heimi í fyrsta sinn í sögunni, eftir að hafa þrívegis komist í lokakeppni Evrópumótsins.

Ef að Ísland tapar hins vegar í kvöld myndi það sjálfsagt flokkast sem sárustu vonbrigði í sögu landsliðsins. Aldrei hefur það komist eins nærri því að fara á HM þrátt fyrir að heppnin hafi svo sannarlega ekki verið á bandi Íslendinga, sem fyrst drógust í undanriðil með þáverandi Evrópumeisturum Hollands og drógust svo á útivöll gegn sterkum andstæðingi í því umspili sem liðið er núna í.

Portúgal er þó í 27. sæti heimslistans, þrettán sætum fyrir neðan Ísland, og komst aðeins inn á EM sem varaþjóð í stað Rússlands. En liðið sýndi styrk sinn með því að slá út Belgíu síðastliðinn fimmtudag og það þarf allt að ganga upp til að Ísland komist á HM í kvöld í stað þess að sitja aftur eftir með sárt enni.

Mögulega aukaumspil í febrúar

Sá möguleiki er svo til staðar að Ísland fái ekki HM-farseðil í kvöld, en eigi samt enn möguleika á að komast á mótið. Flókið fyrirkomulag úr smiðju FIFA og UEFA gerir þetta að verkum.

Ísland leikur í kvöld í einu af þremur umspilseinvígjum Evrópu þar sem í boði eru tvö örugg sæti á HM en eitt sæti í sérstöku aukaumspili í Nýja-Sjálandi í febrúar, með liðum úr öðrum heimsálfum. Það lið sem vinnur sitt umspilseinvígi, en er með lakastan samanlagðan árangur úr undankeppninni og umspili, fer því í þetta aukaumspil.

Ísland átti frábæra undankeppni þó að liðið næði á endanum ekki að slá við Hollandi. Eini möguleikinn á að Ísland endi á að fara í aukaumspilið er því ef að liðið myndi vinna Portúgal í vítaspyrnukeppni í kvöld, og að Írland myndi vinna Skotland á útivelli og Sviss vinna Wales, í hinum tveimur umspilseinvígunum.

Gætu þurft að bíða í tvo tíma eftir niðurstöðu

Leikur Skotlands og Írlands hefst tveimur tímum seinna en hin tvö einvígin, eða klukkan 19, og því er mögulegt að Ísland vinni í vítaspyrnukeppni og þurfi svo að bíða í tvo tíma með að vita hvort að það dugi til að komast beint á HM.

Fari Ísland í aukaumspilið bíða þar níu þjóðir sem liðið hefur aldrei spilað við, og verður þeim skipt í þrjú aðskilin umspil. Þjóðirnar sem bíða í aukaumspilinu eru Kínverska Taípei, Tæland, Kamerún, Senegal, Haítí, Panama, Paragvæ, Síle og Papúa Nýja-Gínea.

Íslensku stelpurnar hafa hins vegar 90 mínútur, eða 120 ef til þarf, til að sjá sjálfar til þess að þær geti fagnað HM-sætinu strax í kvöld.

Ísland og Portúgal mætast klukkan 17, að íslenskum tíma, í úrslitaleik um sæti á HM. Fjallað verður ítarlega um leikinn á Vísi í allan dag.