Brnr leiddi Fylki til sigurs

Snorri Rafn Hallsson skrifar
BRNR

TEN5ION og Fylkir mættust í Nuke og tryggði Tight TEN5ION réttinn til að byrja í vörn í hnífalotunni.

Tight hélt uppteknum hætti og náði þrefaldri fellu í fyrstu lotu til að koma TEN5ION yfir. Þrátt fyrir frábæra fellur frá Brnr með Zeus í þriðju lotu vann TEN5ION og hafði tökin framan af. Hugo og Capping voru einkar hittnir og duglegir í opnunum en Tight tók heldur betur til í endurtökunum.

Fylkismegin voru LeFluff og Brnr allt í öllu og þau tækifæri sem Fylkir þó fékk voru á bakinu á þeim og í ófá skipti voru þeir tveir einir eftir lifandi. Snær komst ekki á blað fyrr en eftir 12 lotur. Engu að síður setti Fylkir saman ágætis leik undir lok hálfleiks til að minnka muninn aðeins.

Staða í hálfleik: TEN5ION 9 – 6 Fylkir

Í síðari hálfleik skiptu liðin um hlutverk og Fylkir jafnaði leikinn eftir nokkrar lotur þegar Snær var kominn í gang. TEN5ION rétt svo hélt yfirhöndinni og var leikurinn í járnum. Hvorugt liðið efnaðist eitthvað sérstaklega og var hver lota því gríðarlega mikilvæg. TEN5ION gekk vel í lotum þegar þeir spöruðu og fóru hratt og tókst þeim með herkjum að komast í stöðuna 14–10.

Það sem gerði gæfumuninn fyrir Fylki var það að Gvendur raðaði inn fellum í vörninni og endurtökurnar undir lokin voru þéttar. Eftir 30 lotur var því allt jafnt og þörf á framlengingu.

Staða eftir venjulegan leiktíma: TEN5ION 15 – 15 Fylkir

Gvendur var áfram atkvæðamikill í framlengingunni þar sem Fylkir vann fyrstu lotuna. TEN5ION svaraði um hæl og liðin skiptust aftur á lotum. Að lokum hafði Fylkir betur þegar Brnr var einn gegn tveimur, kom sprengjunni fyrir og felldi bæði Vikka og Sveittan.

Lokastaða: TEN5ION 17 – 19 Fylkir

Næstu leikir liðanna:

  • Þór – Fylkir, þriðjudaginn 27/9, klukkan 19:30
  • LAVA – TEN5ION, fimmtudaginn 29/9 klukkan 19:30

Sýnt verður frá leikjunum á Stöð 2 Esport og á Twitch síðu Rafíþróttasamtaka Íslands.

Leikirnir




    Velkomin á Vísi. Þessi vefur notar vafrakökur. Sjá nánar.