Vaxtahækkunin var í samræmi við spár greinenda og markaðsaðila en samkvæmt könnun Innherja, sem var gerð dagana 17. til 19. ágúst og greint frá í fyrradag, þá gerði meirihluti ráð fyrir því að peningastefnunefnd bankans myndi hækka vexti um 75 punkta eða meira á fundi sínum í dag.
Þetta er fjórða vaxtahækkun bankans frá áramótum og hafa vextirnir það sem af er ári verið hækkaðir um samanlagt 3,5 prósentur. Meginvextir Seðlabankans hafa núna ekki verið hærri frá því í ágústmánuði árið 2016.
Í uppfærðri þjóðhagsspá Seðlabankans, sem er birt í Peningamálum, kemur fram að horfur séu á tæplega sex prósenta hagvexti í ár en í fyrri spá bankans frá því í maí var gert ráð fyrir um 4,8 prósenta hagvexti.
„Stafar það einkum af þróttmeiri einkaneyslu og hraðari bata í ferðaþjónustu. Störfum heldur áfram að fjölga og atvinnuleysi að minnka og meiri spenna hefur myndast í þjóðarbúinu en áætlað var í maí,“ segir í yfirlýsingu peningastefnunefndar.
Tólf mánaða verðbólga mældist 9,9 prósent í júlí en án húsnæðis nemur hún 7,5 prósentum. Vísbendingar eru um að tekið sé að hægja á miklum verðhækkunum á íbúðamarkaði en húsnæðisverð á höfuðborgarsvæðinu hækkaði um 1,1 prósent í síðasta mánuði – nokkuð minna en markaðsaðilar höfðu búist við – og á síðustu tólf mánuðum er það því upp um 25,5 prósent.
Peningastefnunefndin segir að verri verðbólguhorfur en áður endurspegli kröftugri umsvif í þjóðarbúskapnum en var áætlað í maí og eins „þrálátari“ hækkanir á húsnæðimarkaði ásamt meiri alþjóðlegri verðbólgu. Verðbólguvæntingar hafi einnig hækkað enn meira á flesta mælikvarða.
Telur nefndin því „líklegt“ að herða þurfi taumhald peningastefnunnar enn frekar til að tryggja að verðbólgan hjaðni í markmið innan ásættanlegs tíma. „Peningastefnan mun á næstunni ráðast af þróun efnahagsumsvifa, verðbólgu og verðbólguvæntinga. Ákvarðanir í atvinnulífi, á vinnumarkaði og í ríkisfjármálum munu skipta miklu um hversu hátt vextir þurfa að fara,“ segir í yfirlýsingu hennar.
