Sport

Erna vonsvikin en skemmti sér á fyrsta stórmótinu

Sindri Sverrisson skrifar
Erna Sóley Gunnarsdóttir er Íslandsmethafi í kúluvarpi.
Erna Sóley Gunnarsdóttir er Íslandsmethafi í kúluvarpi. FRÍ

Íslandsmethafinn Erna Sóley Gunnarsdóttir keppti á sínu fyrsta stórmóti í dag þegar hún varð í 22. sæti á Evrópumeistaramótinu í frjálsum íþróttum í München í Þýskalandi.

Erna varpaði kúlunni lengst 16,41 metra í annarri tilraun en gerði svo ógilt í þriðju og síðustu tilrauninni, eftir að hafa lagt mikinn kraft í hana. Íslandsmet Ernu er 17,29 metrar svo hún var nokkuð frá því.

„Ég er ekki alveg nógu ánægð með það, mig langaði að kasta lengra. Mér leið svo ofboðslega vel og var að búast við miklu meira og reyndi of mikið í síðasta kasti og fór því upp á og náði ekki að klára það,“ var haft eftir Ernu á heimasíðu Frjálsíþróttasambandsins eftir keppnina.

Auriol Dongmo frá Portúgal átti besta kastið í undankeppninni í dag en hún varpaði kúlunni 19,32 metra. Sophie McKinna frá Bretlandi varð síðustu inn í úrslitin með 17,33 metra kasti en tólf keppendur keppa í úrslitunum í kvöld. Þangað náði Erna ekki en hún fer frá München reynslunni ríkari.

„Þetta var ógeðslega skemmtilegt mót, gaman að vera á svona stórum leikvangi og ótrúlega mikið af fólki,“ sagði Erna.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.