Fótbolti

Rúnar Alex ekki til FCK þar sem fyrrum liðs­fé­lagi hans mun nú verja mark liðsins

Runólfur Trausti Þórhallsson skrifar
Mathew Ryan (lengst til vinstri) er nýjasti leikmaður FC Kaupmannahafnar en Rúnar Alex Rúnarsson (við hlið hans) var orðaður við félagið eftir að markvörður þess meiddist illa.
Mathew Ryan (lengst til vinstri) er nýjasti leikmaður FC Kaupmannahafnar en Rúnar Alex Rúnarsson (við hlið hans) var orðaður við félagið eftir að markvörður þess meiddist illa. Stuart MacFarlane/Getty Images

Danska meistaraliðið FC Kaupmannahöfn varð fyrir áfalli nýverið er markvörður liðsins meiddist illa og því hóf liðið leit að nýjum markverði. Var Rúnar Alex Rúnarsson, landsliðsmarkvörður Íslands og leikmaður Arsenal á Englandi, nefndur til sögunnar.

Íslendingaliðið FC Kaupmannahöfn varð danskur meistari síðasta vor, með liðinu leika þeir Ísak Bergmann Jóhannesson, Hákon Arnar Haraldsson og Orri Steinn Óskarsson. Nýverið meiddist Kamil Grabara, markvörður liðsins, illa og þá voru góð ráð dýr.

Meðal þeirra sem var orðaður við markvarðarstöðu FCK var Rúnar Alex en hann er ekki inn í myndinni hjá Arsenal og þá þekkir hann vel til í Kaupmannahöfn eftir að hafa leikið með FC Nordsjælland á sínum tíma.

Á endanum ákvað FCK ekki að fá Rúnar Alex í markið en sótti þess í stað fyrrum samherja hans hjá Arsenal og mann sem á að baki fjölda leikja í ensku úrvalsdeildinni.

Ástralinn Mathew Ryan var í dag tilkynntur sem nýjasti leikmaður FCK en sá lék með Arsenal á láni frá ársbyrjun 2021 og fram á sumar sama ár. Eftir það samdi hann við Real Sociedad á Spáni þar sem hann hélt áfram að verma bekkinn líkt og hjá Arsenal og Brighton þar á undan.

Hinn þrítugi Ryan skrifar undir tveggja ára samning við meistaralið FCK sem situr um þessar mundir í 5. sæti dönsku úrvalsdeildarinnar með sex stig eftir fjóra leiki.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.