Bílar

Tesla Model Y að verða mest seldi bíll heims

Kristinn Ásgeir Gylfason skrifar
Séð framan á Model Y.
Séð framan á Model Y. Vilhelm Gunnarsson

Rafjepplingurinn Tesla Model Y er á hraðri leið með að vera mest seldi bíll ársins 2022 þegar horft er til tekna af sölu. Á næsta ári er útlit fyrir að Model Y verði mest seldi bíll heims þegar kemur að seldum eintökum. Það verður að teljast merkilegur árangur fyrir stóran rafbíl.

Elon Musk, framkvæmdastjóri Tesla hélt þessu fram á hluthafafundi Tesla sem fram fór á dögunum. Eins og staðan er núna er Toyota Corolla mest seldi bíll heims, um 1.150.000 eintök voru seld á síðasta ári. Til samanburðar seldi Tesla 936.222 bíla samtals á síðasta ári, þar eru taldar með allar undirtegundir framleiðandans.

Innra rýmið í Tesla Model Y er minimalískt.Vilhelm Gunnarsson

Tesla er stöðugt að auka sölu á sínum bílum og spár gera ráð fyrir að Tesla selji um 1,3 milljón eintaka á þessu ári. Þrátt fyrir erfiðleika með að skaffa íhluti vega innrásar Rússlands í Úkraínu og faraldur kórónaveirunnar.

Eins og er gefur Tesla einungis upp opinberlega samanlagðar sölutölur Model 3 og Model Y sem gerir erfitt fyrir að rýna í nákvæmar tölur. En með Gígaverksmiðjunni í Berlín er Tesla að auka framleiðslugetu til muna. Sú verksmiðja mun eingöngu framleiða Model Y. Evrópskar pantanir munu því verða afgreiddar hraðar en áður. Það er því útlit fyrir að Model Y gæti orðið söluhæsta bifreiðin í heiminum á næsta ári.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.



×