Golf

Evrópumeistarinn með þriggja högga forskot á toppnum

Óskar Ófeigur Jónsson skrifar
Perla Sól Sigurbrandsdóttir á fjórtánda teig   Vestmannaeyjavelli.
Perla Sól Sigurbrandsdóttir á fjórtánda teig   Vestmannaeyjavelli. Mynd/seth@golf.is

Perla Sól Sigurbrandsdóttir, Evrópumeistari unglinga frá því á dögunum, er með þriggja högga forskot þegar keppni í kvennaflokki á Íslandsmótinu í golfi í Vestmannaeyjum er hálfnuð.

Perla Sól, sem heldur ekki upp á sextán ára afmælið sitt fyrr en í lok september, náði forystunni í gær og hélt áfram stöðugum og góðum leik sínum í dag.

Perla Sól, sem er í Golfklúbbi Reykjavíkur, lék annan hringinn á 70 höggum og er samtals á parinu eftir 36 fyrstu holurnar. Ólafía Þórunn Kristinsdóttir, líka úr GR, er í öðru sæti á þremur höggum yfir pari.

Perla Sól hefur spilað báða hringina á sjötíu höggum og í þeim báðum hefur hún verið með þrjá fugla og þrjá skolla.

Ólafía Þórunn var fjórum höggum á eftir Perlu eftir fyrsta daginn en tókst að vinna upp eitt högg í dag. Ólafía lék í dag á 69 höggum eða einu höggi undir pari. Hún náði einum erni og tveimur fuglum.

Berglind Björnsdóttir úr Golfklúbbi Reykjavíkur og Guðrún Brá Björgvinsdóttir úr Golfklúbbnum Keili léku líka báðar mun betur í dag heldur en í gær.

Berglind var í mjög góðri stöðu en fékk skolla á síðustu tveimur holunum eftir að hafa spilað fyrstu sextán holunum á tveimur höggum undir pari. Hún er á sex höggum yfir pari.

Guðrún Brá lék á sjötíu höggum í dag eða á parinu en hún fékk fjóra fugla á hringnum. Hún endaði hringinn mjög vel og náði þremur fuglum á holum tólf til sextán en skolli á átjándu þýddi að hún endaði á sjö höggum yfir pari samanlagt.

Efstu tíu eftir 36 holur af 72 á Íslandsmóti kvenna í golfi:

  • 1. Perla Sól Sigurbrandsdóttir Par
  • 2. Ólafía Þórunn Kristinsdóttir +3
  • 3. Berglind Björnsdóttir +6
  • 4. Guðrún Brá Björgvinsdóttir +7
  • 5. Ragnhildur Kristinsdóttir +8
  • 6. Heiða Guðnadóttir +9
  • 7. Heiðrún Anna Hlynsdóttir +12
  • 8. Ástrós Arnarsdóttir +14
  • 8. Andrea Ýr Ásmundsdóttir +14
  • 8. Saga Traustadóttir +14



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.