Innlent

Dagur og Einar njóta svipaðs fylgis í borgarstjórastólinn

Heimir Már Pétursson skrifar
Einar Þorsteinsson oddviti Framsóknarflokksins og Hildur Björnsdóttir oddviti Sjálfstæðisflokksins fylgjast með þegar Dagur B. Eggertsson telur atkvæði í kosningum til embætta borgarstjórnar í dag.
Einar Þorsteinsson oddviti Framsóknarflokksins og Hildur Björnsdóttir oddviti Sjálfstæðisflokksins fylgjast með þegar Dagur B. Eggertsson telur atkvæði í kosningum til embætta borgarstjórnar í dag. Vísir/Vilhelm

Dagur B. Eggertsson og Einar Þorsteinsson njóta álíka mikils fylgis í embætti borgarstjóra meðal kjósenda flokkanna fjögurra sem mynda nýjan meirihluta í Reykjavík samkvæmt könnun Maskínu. Kosningu í tvö ný ráð borgarinnar var frestað í dag að ósk borgarfulltrúa minnihlutans.

Nú tekur alvaran við. Fyrsti fundur borgarstjórnar var haldinn í Ráðhúsinu klukkan tvö í dag þar sem meðal annars var kosið til embætta. Kom ekki á óvart að Þórdís Lóa Þórhallsdóttir var kjörin forseti borgarstjórnar og Einar Þorsteinsson formaður borgarráðs. Dagur B. Eggertsson fékk einu atkvæði fleira í embætti borgarstjóra næstu 18 mánuðina en meirihlutaflokkarnir hafa.

Líf Magneudóttir oddviti Vinstri grænna greiddi Degi B. Eggertssyni atkvæði sitt í embætti borgarstjóra í dag.Vísir/Vilhelm

Líf Magneudóttir oddviti Vinstri grænna staðfesti að hún hefði greitt Degi atkvæði sitt en Vinstri græn sátu í fyrri meirihluta. Einar tekur svo við borgarstjórastólnum í janúar 2024 af Degi sem þá verður formaður borgarráðs.

Kosið var í fimm ráð borgarinnar í dag þar sem fulltrúar flokkanna skipta með sér formennsku. Kosningum í nýtt stafrænt ráð og nýtt mannréttindaráð var hins vegar frestað að ósk minnihlutans til næsta borgarstjórnarfundar.

Meirihlutaflokkarnir skipta með sér formennsku í ráðum borgarinnar. Minnihlutinn fékk frest á kjöri í tvær nýjar nefndir og gagnrýndi lítinn frest til að kynna sér breytingarnar.Grafík/Kristján

Húsnæðis- og skipulagsmál verða fyrirferðarmikil

Dagur segir húsnæðismál, samgöngumál, málefni barna og velferðarmál áberandi. En með í pakkanum eru einnig mál sem erfitt hefur verið að leysa á undanförnum árum eins og framtíð Reykjavíkurflugvallar og ný íbúðabyggð við flugvöllinn í Skerjafirði og Sundabraut.

Verða þau alveg leyst á kjörtímabilinu?

„Já, þetta gæti orðið lykilkjörtímabil varðandi þessi mál. Bæði varðandi hverfið í Skerjafirði en líka þær rannsóknir sem standa yfir í Hvassahrauni. Samkvæmt tímaáætlunum ættu niðurstöður að liggja fyrir einhvern tíma næsta árið. Þannig að það verður að mörgu að hyggja og spennandi kjörtímabil framundan,“ segir Dagur.

Einar Þorsteinsson segir kjósendur Framsóknarflokksins hafa náð fram stefnubreytingum í kosningunum og komið sínum manni í borgarstjórastólinn.Vísir/Vilhelm

Einar segir fyrstu breytingarnar koma skýrt fram í 18 liðum í meirihlutasáttmálanum.

„Það sýnilegasta er að við ætlum að úthluta lóðum í Úlfarsárdal og Kjalarnesi. Keyra hugmyndasamkeppni í gang á Keldum og Keldnaholti. Úthluta íGufunesi. Þetta er skýrasta stefnubreytingin að nú er farið að úthluta þarna. Hér hefur verið þéttingarstefna. Við styðjum hana en við viljum gera fleira,“ segir Einar

Þá verði ráðist í umhverfismat vegna Sundabrautar.

„Þannig að þeir sem kusu Framsókn núna í vor náðu að fella meirihlutann. Þeir náðu að breyta stefnunni og fá sinn mann íborgarstjórastólinn,“ segir Einar. En Framsóknarflokkurinn hefur aldrei áður fengið það embætti.

Ný könnun

Lítill munur er á fylgi Dags og Einars í embætti borgarstjóra meðal kjósenda meirihlutaflokkanna.Grafík/Kristján

Í nýrri könnun Maskínu sem birt var í dag kemur fram að Einar nýtur mesta fylgis í embætti borgarstjóra meðal allra kjósenda, eða ríflega 52 prósenta. En hann og Dagur njóta álíka fylgis í embættið á meðal kjósenda Framsóknarflokks, Samfylkingarinnar, Pírata og Viðreisnar. Einar með 37,4 prósent, Dagur 36,8 prósent, Dóra Björt Guðjónsdóttir með rétt tæp tuttugu prósent og Þórdís Lóa Þórhallsdóttir með 5,8 prósent.

Einar nýtur mun meira fylgis í embætti borgarstjóra en Dagur þegar kjósendur allra flokka í borgarstjórn eru spurðir.Grafík/Kristján

Einar nýtur hins vegar lang mesta fylgis íborgarstjórastólinn þegar kjósendur minnihlutaflokkanna eingöngu eru spurðir, eða 73 prósenta fylgis.


Tengdar fréttir

Vonast eftir hraðri uppbyggingu á kjörtímabilinu

Oddvitar Framsóknarflokksins og Viðreisnar eru bjartsýnir á að framkvæmdir við nýjar íbúðir og Sundabraut geti farið hratt af stað á kjörtímabilinu. Nýr meirihluti sé einhuga um að drífa Sundabraut áfram.

Verkaskipting í nefndum og ráðum borgarinnar gerð ljós í dag

Borgarstjóri segir að borgarlínu verði flýtt svo hægt verði að hefja uppbyggingu á Keldnalandinu sem fyrst. Gripið verði til nauðsynlegra mótvægisaðgerða ef þörf krefji eftir áhættumat sem unnið verði af Ísavía vegna uppbyggingar við Reykjavíkurflugvöll. Verkaskipting nýja meirihlutans í nefndum og ráðum kemur í ljós í dag.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×