Innlent

Vonast eftir hraðri uppbyggingu á kjörtímabilinu

Kjartan Kjartansson skrifar
Einar Þorsteinsson (t.v.), Þórdís Lóa Þórhallsdóttir (f.m.) og Dóra Björt Guðjónsdóttir (t.h) þegar þau kynntu nýjan meirihluta í borgarstjórn Reykjavíkur á öðrum degi hvítasunnu.
Einar Þorsteinsson (t.v.), Þórdís Lóa Þórhallsdóttir (f.m.) og Dóra Björt Guðjónsdóttir (t.h) þegar þau kynntu nýjan meirihluta í borgarstjórn Reykjavíkur á öðrum degi hvítasunnu. Vísir/Ragnar

Oddvitar Framsóknarflokksins og Viðreisnar eru bjartsýnir á að framkvæmdir við nýjar íbúðir og Sundabraut geti farið hratt af stað á kjörtímabilinu. Nýr meirihluti sé einhuga um að drífa Sundabraut áfram.

Hluti af málefnasamningi nýs meirihluta Framsóknar, Samfylkingar, Pírata og Viðreisnar sem var kynntur í gær er að úthluta lóðum í Úlfarsárdal, Gufunesi og Kjalarnesi til að auka framboð á íbúðarhúsnæði í borginni.

Þórdís Lóa Þórhallsdóttir, oddviti Viðreisnar, sagði að byrjað yrði fljótt að úthluta lóðunum í þættinum Bítinu á Bylgjunni þar sem hún var gestur ásamt Einari Þorsteinssyni, oddviti Framsóknarflokksins í morgun.

Hún sagði að á skömmum tíma hafi ástandið á húsnæðismarkaði farið úr offramboði í Covid-faraldrinum yfir í skort nú. Meirihlutaflokkarnir hafi þegar staðið fyrir mesta uppbyggingarskeiði íbúðarhúsnæðis í sögunni undanfarin fjögur ár. Þeir séu klárir í slaginn nú að bæta enn í, bæði með frekari þéttingu úthverfanna og dreifingu byggðar.

Húsnæðismál ekki eins og Neskaffi

Bæði lögðu þau áherslu á að það tæki einhvern tíma að sjá árangurinn af húsnæðisátaki nýja meirihlutans.

„Vandinn er sá að húsnæðis- og skipulagsmál eru ekki eitthvað eins og frítt í sund þar sem þú hættir að rukka. Nú er verkefnið á þessu kjörtímabili að snúa olíuskipinu. Þetta tekur tíma en verkefnið er að keyra þetta áfram eins hratt og hægt er, samt skynsamlega þannig að þetta verði vel heppnað. Ég er bara fullur bjartsýni,“ sagði Einar.

Þórdís Lóa tók í sama streng. Búið væri að leggja jarðveginn, meðal annars með samþykkt nýs aðalskipulags, og lóðir séu fyrir hendi.

„Húsnæðismál eru ekki eins og Neskaffi þar sem þú blandar bara saman og ert kominn með kaffi. Þetta er langtímaáætlun, það er ekkert sem gerist bara á morgun.“

Þökk sé góðum undirbúningi sé hægt að fara hraðar af stað í uppbygginguna. Ef það hefði ekki verið gert hefði ekkert gerst næstu þrjú til fjögur árin.

„Þessar breytingar sem við erum að fara í núna, við getum farið hratt og örugglega í þær,“ sagði Þórdís Lóa.

Einhuga um að keyra Sundabraut áfram

Hvað Sundabraut varðar stendur til að ráðast í umhverfismat strax í sumar. Þórdís Lóa sagði að í framhaldinu þyrfti að samráð við íbúa að eiga sér stað enda hefði framkvæmdin í för með sér mikið rask fyrir íbúa í Vogahverfi, Laugardal og Grafarvogi.

Einar sagði að vafalaust yrði karpað um leiðarvalið fyrir Sundabraut. Nýi meirihlutinn ætlaði sér hins vegar að taka ákvarðanir og keyra verkefnið áfram.

„Stóra fréttin er sú að þessi meirihluta er einhuga um það að keyra þetta verkefni áfram,“ sagði hann.

Borgarbúar þyrftu þó að vera meðvitaðir um að samkvæmt fyrstu verkáætlun ætti framkvæmdum við Sundabraut ekki að ljúka fyrr en 2031.

„En það þarf að stíga þessu stóru skref á þessu kjörtímabili svo að það verði af því.“


Tengdar fréttir

Frítt í sund og strætó fyrir börn einu fingra­för Fram­sóknar að mati Hildar

Hildur Björnsdóttir, oddviti Sjálfstæðisflokksins í borgarstjórn, segir að henni virðist einu fingraför Framsóknarflokksins á málefnasamningi nýja meirihlutans í borginni vera að frítt verði í sund og strætó fyrir börn. Hún kvartar yfir leiðindapólitík sem hafi verið stunduð þegar flokkar voru að máta sig í meirihlutaviðræðum.

Borgar­lína mikil­vægari en borgar­stjóra­stóllinn

Dagur B. Eggertsson segir það skipta sig meira máli að tryggja framgang lykilverkefna á borð við Borgarlínu en að vera borgarstjóri. Tilkynnt var í dag að Einar Þorsteinsson, oddviti Framsóknar, myndi taka við borgarstjórastólnum eftir átján mánuði og gegna embættinu meirihluta kjörtímabilsins.

Einar tekur við af Degi sem borgar­stjóri árið 2024

Dagur B. Eggertsson, oddviti Samfylkingarinnar og borgarstjóri, mun áfram gegna embætti borgarstjóra Reykjavíkur fyrri hluta kjörtímabilsins, eða til ársloka 2023. Einar Þorsteinsson, oddviti Framsóknar, mun síðan taka við embættinu af Degi í ársbyrjun 2024. Á kjörtímabilinu mun Dagur því gegna embættinu í rúmlega eitt og hálft ár, en Einar í tæplega tvö og hálft ár.  



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×