Fótbolti

„Allt liðið er á bak við Írisi og fjölskyldu hennar“

Atli Arason skrifar
Nik Chamberlain, þjálfari Þróttar.
Nik Chamberlain, þjálfari Þróttar. Diego

Þróttur vann 1-2 útisigur í Keflavík í Bestu-deild kvenna í kvöld. Nik Chamberlain, þjálfari Þróttar, sagði að sigurinn í kvöld væri fyrir Írisi Dögg Gunnarsdóttur, markvörð Þróttar, og fjölskyldu hennar en afi Írisar var borin til grafar fyrr í dag.

„Dagurinn er búinn að vera erfiður fyrir okkur öll þar sem að afi Írisar var jarðsunginn í dag. Allt liðið er búið að styðja við bakið á henni í dag. Við sýndum mikinn karakter í leiknum og þetta var frábær liðsframmistaða,“ sagði Nik Chamberlain, þjálfari Þróttar, í viðtali við Vísi eftir leik.

Sigurmark Þróttar kom á síðustu mínútu leiksins en það skoraði Freyja Karín Þorvarðardóttir.

„Ég var glaður að sjá boltann í netinu en þetta var umfram allt frábært fyrir Freyju. Hún er búin að vera að leggja mikið á sig og var mjög dugleg þarna efst á vellinum í kvöld og vann sína vinnu vel. Þetta var alvöru skallamark en hún sýndi mikið hugrekki að fara upp í einvígi með markmann þeirra á fleygiferð á móti sér.“

„Þetta er mikill léttir því þetta var leikur sem við stjórnuðum. Ég vissi að við urðum að vera þolinmóðar með boltann en við gáfum þeim nokkrar skyndisóknir sem við gátum forðast,“ bætti Chamberlain við.

„Þær voru ekki að valda okkur vandræðum en í markinu sem þær skora voru þær einmitt að bíða eftir að við myndum gera einhver mistök og þær nýttu sér mistökin okkar vel. Mjög mikill léttir að ná sigrinum samt því við vorum í stjórn allan leikinn.“

Með sigrinum er Þróttur komið á topp Bestu-deildarinnar en Chamberlain er lítið að spá í stöðuna í deildinni á þessari stundu.

„Ég er ekki búinn að hugsa neitt út í það núna, ég er bara glaður að við náðum í sigur í kvöld. Allt liðið er á bak við Íris og fjölskyldu hennar og stiginn þrjú í dag eru fyrir þau,“ sagði Nik Chamberlain, þjálfari Þróttar.

 




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.