Viðskipti innlent

Davíð Helga­­son beinir sjónum sínum að lofts­lags­málum

Vésteinn Örn Pétursson skrifar
Davíð Helgason er stofnandi Unity. Hann vill koma auga á lausnir á loftslagsvandanum og byggja þær upp á Íslandi.
Davíð Helgason er stofnandi Unity. Hann vill koma auga á lausnir á loftslagsvandanum og byggja þær upp á Íslandi.

Davíð Helgason, stofnandi fyrirtækisins Unity, hefur komið á fót fyrirtækinu Transition Labs, ásamt Kjartani Erni Ólafssyni, frumkvöðli og tæknifjárfesti. Markið félagsins er að gera Ísland að suðupunkti loftslagsverkefna á heimsvísu.

Þetta kemur fram í tilkynningu um stofnun fyrirtækisins. Þar segir að starfsemi fyrirtækisins byggi á því að „leita uppi framúrskarandi erlend loftslagsverkefni, aðstoða við að koma þeim á legg hér á landi og auðvelda þeim að skala fyrirtækin upp í rekstrarhæfa stærð. Stofnendur Transition Labs telja að nú þegar séu til fjölmargar áhrifaríkar lausnir sem geti auðveldað baráttuna við loftslagsvandann en flöskuhálsinn hafi reynst sá langi tími sem taki fyrir nýja tækni að ryðja sér til rúms.“

Þá segir að fyrirtækið hafi þegar hafið samstarf við sum af metnaðarfyllstu loftslagsverkefnum heims. Fyrsta fyrirtækið sem muni hefja uppbyggingu hérlendis fyrir tilstilli Transition Labs verði þá kynnt á næstunni.

Kjartan Örn Ólafsson er framkvæmdastjóri Transition Labs. Í tilkynningunni er haft eftir honum að á Íslandi séu kjöraðstæður fyrir ýmiskonar loftslagsverkefni. 

„Við eigum í okkar röðum frábært vísindafólk og heilmikla uppsafnaða reynslu af þeim loftslagsverkefnum sem þegar eru starfrækt hér á landi. Við búum að grænni orku, bergtegundum sem nýtast í sumum verkefnum, hafinu sem nýtist í öðrum og þannig mætti áfram telja,“ er haft eftir Kjartani.

Nauðsynlegt sé að draga úr losun gróðurhúsalofttegunda á öllum stigum hagkerfisins og fjarlægja gróðurhúsalofttegundir úr andrúmsloftinu, svo ná megi markmiðum um kolefnishlutleysi. Markmið Transition Labs sé að koma auga á bestu lausnirnar á þeim sviðum. 





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.