Viðskipti innlent

Davíð í Unity og Ný­sköpunar­vika efna til lofts­lags­við­burðarins „Ok, bye“ í Hörpu

Atli Ísleifsson skrifar
Davíð Helgason, frumkvöðull og fjárfestir, segir að flestar af þeim lausnum sem við þurfum til þess að leysa loftslagsvandann séu til nú þegar til. Þó þurfi að finna þær, sanna þær, besta þær, fjárfesta í þeim og skala þær upp.
Davíð Helgason, frumkvöðull og fjárfestir, segir að flestar af þeim lausnum sem við þurfum til þess að leysa loftslagsvandann séu til nú þegar til. Þó þurfi að finna þær, sanna þær, besta þær, fjárfesta í þeim og skala þær upp. Aðsend

Davíð Helgason, fjárfestir og einn stofnandi hugbúnaðarfyrirtækisins Unity Technologies, og Nýsköpunarvika (Iceland Innovation Week) hafa efnt til sérstaks loftslagsviðburðar í Hörpu þann 18. maí næstkomandi. Listamenn, frumkvöðlar og nokkrir helstu loftslagsfjárfestar heims munu þar koma fram en ætlunin er að skapa samtal og vekja athygli á Íslandi sem miðpunkti í loftslagsmálaumræðunni.

Þetta kemur fram í tilkynningu. Nafn viðburðarins „Ok, bye“ vísar í jökulinn Ok sem var fyrsti íslenski jökullinn til að hverfa árið 2014.

„Minnisvarði um jökulinn var settur upp og minningarathöfn haldin sem vakti mikla athygli út um allan heim. Jöklar eru ein skýrasta vísbendingin um hnattræna hlýnun hafs og andrúmslofts en þeir rýrna nú hratt um allan heim og vara við hvert stefnir.

Ok, bye er ætlað að vekja athygli á Íslandi sem miðpunkti í loftslags umræðunni og laða til landsins fleiri græn tækifæri á stærri skala en þekkst hefur. Ætlunin er að skoða þær breytingar sem framundan eru frá uppbyggilegu sjónarhorni og varpa ljósi á lausnirnar og frumkvöðlana sem eru í raun að breyta heiminum. Þannig gefst tækifæri til að afla sér sérfræðiþekkingar en jafnframt tengjast frumkvöðlum, fjárfestum og listafólki allstaðar að úr heiminum. Viðburðurinn er ekki hefðbundin ráðstefna í þeim skilningi heldur frekar gjörningur, þar sem fyrirlestrar og umræður tvinnast saman við listrænar uppákomur, tónlist og sjónræna upplifun. Þennan eina dag verður Silfurbergi í Hörpu breytt í íslenskt sumar, staðsett mitt á milli fortíðar og framtíðar,“ segir í tilkynningunni.

Alls staðar efst á baugi

Melkorka Sigríður Magnúsdóttir, framkvæmdastjóra Iceland Innovation Week, segist ótrúlega spennt að taka höndum saman með Davíð Helgasyni og hans teymi og skapa þennan sérstaka viðburð á hátíðinni. „Loftslagsmálin eru allstaðar efst á baugi og vandamálin sem við stöndum frammi fyrir eru stór og aðkallandi. Á Ok, bye er ætlunin hins vegar að einblína á lausnirnar og hvað við þurfum að gera til að koma okkur yfir markið þegar kemur að því að standa við skuldbindingar Parísarsáttmálans,“ er haft eftir Melkorku Sigríði í tilkynningunni, en Nýsköpunarvikan fer fram dagana 16. -20. maí.

Meðal þeirra sem koma fram eru Davíð Helgason frumkvöðull og fjárfestir, Ari Helgason loftslagsfjárfestir, Edda Sif Pind Aradóttir framkvæmdastjóri Carbfix, Lindsey Higgins loftslagsráðgjafi Pale blue dot í Svíþjóð, Marty Odlin framkvæmdastjóri og stofnandi Running Tide, Salka Sigurðardóttir, loftslagsráðgjafi hjá bresku ríkisstjórninni og Sarah Sclarsic meðstofnandi Voyager fjárfestingasjóðsins í Bandaríkjunum. Meðal þeirra listamanna sem koma fram verða svo Hildur, Una Torfa, Teitur Magnússon, Kvennakórinn Katla, Guðmundur Felixson, Milkywhale og fleiri.

Þurfum að besta lausnirnar

Haft er eftir Davíð Helgasyni að flestar af þeim lausnum sem við þurfum til þess að leysa loftslagsvandann séu til nú þegar til. Þó þurfi að finna þær, sanna þær, besta þær, fjárfesta í þeim og skala þær upp. 

„Á viðburðinum koma saman fjárfestar, frumkvöðlar, vísindafólk, listafólk, pólitíkusar og aðrir lykilaðilar í loftslagsgeiranum og ég hlakka til að sjá hreyfinguna í kringum loftslagsmál vaxa enn frekar,“ segir Davíð.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.