Atvinnulíf

Bráðsmitandi skap stjórnenda og góð ráð

Rakel Sveinsdóttir skrifar
Við getum öll haft mismunandi áhrif á hvort annað eftir því í hvernig skapi við erum í. En á vinnustað er það skap stjórnandans sem hefur mestu áhrifin og getur hreinlega verið bráðsmitandi: Á jákvæðan hátt og neikvæðan. Það í hvernig skapi yfirmaðurinn er, getur fljótt haft áhrif á liðsheildina og árangur.
Við getum öll haft mismunandi áhrif á hvort annað eftir því í hvernig skapi við erum í. En á vinnustað er það skap stjórnandans sem hefur mestu áhrifin og getur hreinlega verið bráðsmitandi: Á jákvæðan hátt og neikvæðan. Það í hvernig skapi yfirmaðurinn er, getur fljótt haft áhrif á liðsheildina og árangur. Vísir/Getty

Gott skap smitar. Vont skap smitar. En fátt er þó meira smitandi á vinnustaðnum en skap stjórnandans.

Sem þýðir að fólk sem er í stjórnendastöðum þarf einfaldlega að huga betur að skapinu sínu alla daga en aðrir.

Sem þó þurfa að huga vel að sínu skapi og líðan.

Munurinn er sá að það er skap stjórnandans og hegðun sem hefur mestu áhrifin á starfsfólkið í heild sinni.

Yfirmaður sem mætir þungur í skapi í vinnuna hefur miklu meiri áhrif á líðan starfsfólks síns heldur en Pétur eða Páll sem stundum fara öfugt fram úr á morgnana. 

Á ensku er talað um „emotional contagion“ áhrif stjórnenda á starfsfólk. Sem þýðir tilfinningasmit stjórnenda til starfsfólks.

Og það hvernig skap stjórnandans hefur áhrif á starfsfólk og teymi, getur skipt sköpum þegar kemur að árangri, drifkrafti, starfsánægju, líðan starfsfólks og frammistöðu almennt.

Í umfjöllun Fastcompany er um þetta tilfinningasmit rætt með tilvísun í enska orðatiltækið „leaders bring the weather,“ eða ,,leiðtogar koma með veðrið með sér.

Hér eru nokkur ráð fyrir stjórnendur.

Hvernig ertu í dag?

Sem yfirmaður mun skapið þitt í dag hafa áhrif á marga aðra í vinnunni. Alla morgna þarftu því að byrja á því að taka hreinlega stöðuna á sjálfum þér: Hvernig ertu? Hvernig líður þér?

Eitt af því góða sem þessi daglega venja skilar er ekki bara aukin meðvitund fyrir vinnudaginn framundan, heldur er þetta líka einföld leið til að taka stöðu hjá þér sjálfum á streitu eða kulnunareinkennum.

Hresstu þig við

Við eigum öll okkar ólíku daga. Einn daginn gætum við verið stressuð og utan við okkur vegna þess að við erum í kappi við tímann með einhver verkefni eða fórum of seint að sofa í gær.

En sem yfirmaður hefur þú áhrif á hópinn og skref tvö felst því hreinlega í því að hressa sig við, draga andann djúpt og taka ákvörðun um að vera í góðu skapi þegar þú mætir til vinnu.

Annað er ekki í boði.

Líkamstjáningin

En starfsfólk er fljótt að átta sig á því ef brosið nær ekki til augnanna eða yfirmaður reynir að vera hress en er utan við sig og stressaður.

Og hvað er til ráða þá?

Jú, við getum staðið okkur betur í þessu ef við erum meðvituð um alla okkar líkamstjáningu. Allt frá því hvernig við stöndum, sitjum, hreyfum okkur eða brosum. Starfsfólk sem sér að yfirmaðurinn er afslappaður í framkomu og líkamstjáningu líður betur.

Jákvæð orka, jákvæð nærvera

Sem yfirmaður ertu að vinna að því alla daga að vinnustaðurinn þinn eða teymið nái sem bestum árangri. Jafnvel framúrskarandi.

Sem þýðir að þú vilt hafa jákvæð áhrif á móralinn, drifkraftinn og góða starfsandann í vinnunni.

Að efla og byggja upp jákvætt andrúmsloft á vinnustað eða í teymum tekst best ef yfirmaðurinn er fyrirmyndin af því að gefa frá sér jákvæða orku, hafa jákvæða nærveru og stuðla að því alltaf að byggja upp góðan móral.

Neikvæðni er ekki í boði. Hvað þá að vera fúll.

Þú

En er í alvörunni hægt að gera þá kröfu að fólk í stjórnendastöðum standi undir þessum kröfum alla daga?

Já, það er hægt en aðeins þó ef stjórnandinn sjálfur hugsar vel um sjálfan sig líka. Því það að vera í góðu skapi í vinnunni alla daga, sýna engin streitumerki sama hvað gengur á, vera alltaf afslappaður í fasi og framkomu og brosa hverja stund til augnanna er hreinlega ekki hægt nema….yfirmanninum líði vel!

Að taka að sér stjórnendastarf er krefjandi og spennandi verkefni. En oft gleymist að það er einmitt þá sem allir þurfa að vera mjög meðvitaðir um að allt sem heitir að huga að sjálfum sér skiptir jafnvel enn meira máli en áður.

Allt frá góðum svefn yfir í aðra sjálfsrækt. Hvort sú sjálfsrækt felst í hreyfingu, hugleiðslu, markþjálfun, hjá sálfræðingi eða öðru er undir hverjum og einum að velja.

Aðalmálið er að til þess að hafa sem bestu smitáhrifin á starfsfólk og teymi þarf yfirmaður að leggja rækt við sjálfan sig og líta á það sem lykilatriði til að standa sig vel í starfi.


Tengdar fréttir

Svona gengur okkur best í vinnunni

Við viljum öll standa okkur vel en það er óþarfi að bíða eftir árlegu frammistöðumati í vinnunni til að setja okkur markmið eða átta okkur betur á því hvernig við stöndum okkur.

„Gott að muna alltaf eftir því að brosa og segja takk“

Þau er vægast sagt frábær ráðin sem tveir forkólfar í atvinnulífinu gefa sér yngri stjórnendum í Atvinnulífinu í dag. En það eru þau Guðbjörg Heiða Guðmundsdóttir, framkvæmdastjóri Marel á Íslandi og Gunnar Egill Sigurðsson, forstjóri Samkaupa.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×