Viðskipti innlent

Króli, Ás­geir, Alma og Johanne ráðin til Pipars\TBWA

Atli Ísleifsson skrifar
Ásgeir Tómasson, Alma Guðmundsdóttir, Kristinn Óli Haraldsson og Johanne Turk.
Ásgeir Tómasson, Alma Guðmundsdóttir, Kristinn Óli Haraldsson og Johanne Turk. Pipar\TBWA

Auglýsingastofan Pipar\TBWA hefur ráðin til sín fjóra nýja starfsmenn, þau Ásgeir Tómasson, Ölmu Guðmundsdóttur, Kristinn Óla Haraldsson og Johanne Turk.

Í tilkynningu segir að Ásgeir sé ráðinn sem hreyfigrafíker, Alma sem nýr fjármálastjóri, Kristinn Óli sem texta- og hugmyndasmiður og Johanne Turk sem mun hafa með höndum leitarvélabestun.

„Ásgeir Tómasson lauk námi í stafrænni hönnun frá Tækniskóla Íslands fyrir einu ári og kom til starfa síðasta sumar. Hann leggur gjörva hönd á alla hönnun þar sem hreyfingar er þörf. Það tók hann nokkurn tíma að átta sig á því hvað hann langaði að stunda í lífinu en eftir viðkomu í líffræði og tölvunarfræði söðlaði hann um yfir í hreyfigrafíkina og fann þar sína réttu hillu.

Alma Guðmundsdóttir er viðskiptafræðingur frá Háskólanum á Akureyri. Hún hefur starfað við bókhald, skrifstofuhald og fjármálastjórn í gegnum tíðina, lengst af hjá Íslenskum markaðsrannsóknum, Gallup, síðar Capacent. Í kjölfarið gerðist hún fjármálastjóri Já hf., um tveggja ára skeið eða þar til hún gerðist fjármálastjóri hjá Hjallastefnunni árið 2017 þaðan sem hún kom nú í febrúar til starfa í Pipar\TBWA. Utan vinnunnar, starfar hún með Soroptimistum sem er alþjóðleg hreyfing kvenna. Innan þeirra samtaka hefur hún gegnt ýmsum trúnaðarstörfum og er núna fyrsti varaforseti Landssambands Soroptimista.

Kristinn Óli Haraldsson hefur getið sér gott orð sem tónlistarmaður, leikari og jafnvel leikstjóri. Dúóið JóiP og Króli varð landsþekkt fyrir fáum árum og nýtur mikilla vinsælda og samstarf þeirra félaga stendur enn. Frá unga aldri hefur Kristinn Óli tekið þátt í og farið með hlutverk bæði á sviði sem og í kvikmyndum og sjónvarpsþáttum, sem leikari ætlar að starfa, söngvari og dansari. Hann lætur sér ekkert mannlegt óviðkomandi og er þegar orðinn öflugur liðsstyrkur. Kristinn Óli hóf störf í febrúar á þessu ári.

Johanne Turk lauk háskólamenntun í háskólanum í Lille í Norður-Frakklandi, mastersgráðu í vef- og margmiðlun. Í náminu kviknaði brennandi áhugi á leitarvélabestun en hún er einnig með góðan grunn í forritun. Að námi loknu starfaði hún á vefstofu í Norður-Frakklandi í sínu fagi, leitarvélabestun, en réði sig síðan til einnar stærstu vefstofu Frakklands þar sem hún öðlaðist enn frekari starfsreynslu í þeirra grein. Hún ákvað síðan að söðla um og flytjast búferlum til Íslands og kom til starfa hjá Pipar\TBWA á haustmánuðum,“ segir í tilkynningunni.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×