Neytendur

Fjármálaráðherra útilokar ekki inngrip haldi miklar eldsneytishækkanir áfram

Berghildur Erla Bernharðsdóttir skrifar
Bjarni Benediktsson fjármálaráðherra segir að komi til aðgerða vegna verðbólguþróunnar muni þær beinast að tekjulægstu heimilum landsins. Fari bensínverð í hæstu hæðir sé þó ekki útilokað að stjórnvöld grípi inn í.
Bjarni Benediktsson fjármálaráðherra segir að komi til aðgerða vegna verðbólguþróunnar muni þær beinast að tekjulægstu heimilum landsins. Fari bensínverð í hæstu hæðir sé þó ekki útilokað að stjórnvöld grípi inn í. Vísir/Sigurjón

Fjármálaráðherra útilokar ekki að ríkið lækki tímabundið álögur á eldsneytisverð fari verð þess upp í hæstu hæðir. Það sé hins vegar ekki verið að horfa til þeirra leiðar nú til að ná verðbólgunni niður. Heldur fyrst og fremst sértækra aðgerða fyrir tekjulægstu hópa samfélagsins.

Miklar sveiflur hafa verið á heimsmarkaðsverði á eldsneyti en í síðustu viku fór verð á bensínlítranum upp í um og yfir 300 krónur. Hinir ýmsu stigu fram og hvöttu stjórnvöld til að lækka álögur á bensín tímabundið til að koma í veg fyrir verðbólguskot þar á meðal Félag íslenskra bifreiðaeigenda. Félagið hvatti enn á ný stjórnvöld í vikunni en heimsmarkaðsverð á eldsneyti lækkaði þó aðeins í þessari viku. Þá hafa ýmsar hrávörur hækkað mikið undanfarnar vikur vegna innrásar Rússa í Úkraínu. 

Í nýrri verðbólguspá Landsbankans kemur fram að búist sé við 6,8% verðbólgu í þessum mánuði og hækkun um 1%  milli mánaða. Mikil óvissa sé um þróun olíuverðs, fasteignaverðs og gengi krónunnar. Þá hafi verðbólga í helstu viðskiptalöndum í sumum tilfellum ekki verið hærri í nokkra áratugi. Það muni skila sér hingað til lands í meiri verðbólgu á innfluttum vörum.

Bjarni Benediktsson fjármálaráðherra segir að fyrst og fremst sé horft til sértækra aðgerða fyrir tekjulægstu hópanna nú vegna verðbólguþróunarinnar.

„Ríkisstjórnin hefur rætt um mögulegar aðgerðir vegna verðbólgu en við erum ekki komin með mótaðar tillögur í því efni.  Verðbólgan mun alltaf fyrst bitna á tekjulægstu heimilunum. Þess vegna er ég frekar þeirrar skoðunar að við kæmum fyrst með sérsniðnar lausnir fyrir þau heimili ef við kæmum með einhvers konar aðgerðir.  Ef við færum í þá almennu aðgerð að slá niður álögur á eldsneyti þá væri það tiltölulega dýrt og myndi ekki ná til þeirra sem hafa minnst milli handanna heldur myndi hún fara þvert yfir samfélagið og við værum að kosta miklu til,“ segir hann. 

Haldi eldsneytisverð áfram að hækka mikið útilokar Bjarni þó ekki inngrip.

„Á þessari stundu er ekki að koma fram tillaga um að draga úr álögum á eldsneyti en það kann að vera að ef mál þróast á versta veg að eitthvað slíkt kæmi til álita síðar,“ segir Bjarni. 


Tengdar fréttir

Búist við innfluttri og innlendri verðbólgu: Skorað á ríkið að minnka álögur

Félag íslenskra bifreiðaeigenda hvetur stjórnvöld til að fara að fordæmi Íra og lækka álögur á eldsneyti vegna gríðarlegra hækkana síðustu daga. Slíkar lækkanir hafa ekki verið sérstaklega ræddar í fjármálaráðuneytinu. Bent er á að Íslendingar séu lánsamir að þurfa ekki að kynda með eldsneyti.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.