Neytendur

Íslenskt (staðfest)

Snorri Másson skrifar
Svona lítur nýtt íslenskt upprunamerki út.
Svona lítur nýtt íslenskt upprunamerki út. Vísir/Snorri

Nýtt upprunamerki fyrir íslensk matvæli, Íslenskt staðfest, var kynnt í dag. Því er ætlað að fræða neytendur, sem eru sagðir vilja skýrar upplýsingar um uppruna matvöru. 

Eftir nokkra mánuði fer nýs upprunamerkis að gæta á umbúðum íslenskra matvæla, Íslenskt staðfest.

Ef þetta merki er til dæmis á grunnafurðum eins og mjólk, kjöti, eggjum eða sjávarafurðum þýðir það að maturinn sé 100% íslenskur, hann sé framleiddur hér og honum pakkað inn.

Þetta gildir einnig um blóm.

Í blönduðum og unnum vörum, eins og jógúrt eða osti, má 25% innihaldsins vera innflutt.

Hingað til hafa ólíkir ósamræmdir límmiðar tengdir hinu og þessu átakinu hverju sinni verið í umferð, en Íslenskt staðfest er faglegur úthugsaður gæðastuðull - ævinlega vottaður með eftirliti þriðja aðila.

Aðsend mynd

Svandís Svavarsdóttir matvælaráðherra segir lengi hafa verið unnið að upprunamerkinu - fagnaðarefni að það sé loks í höfn eftir flókið ferli.

„Þarna erum við komin með merki sem staðfestir bæði upprunann og framleiðsluna og svo smásöluna líka. Þetta er í raun og veru aukin neytendavernd, meiri meðvitund um innlenda framleiðslu og þar með erum við líka komin nær því sem við þekkjum úr umræðunni í dag, sem er umfjöllun um kolefnisspor, hringrásarhagkerfi, loftslagsáhrif og svo fæðuöryggi,“ segir Svandís í samtali við fréttastofu.

Ætlar þú bara að kaupa Íslenskt staðfest? 

„Ég reyni alltaf að kaupa íslenskt, mér finnst það skipta mjög miklu máli, og þetta mun hjálpa mér eins og öðrum neytendum.“

Svo er talað um að kjör fólks í matvælaframleiðslu séu ekki alveg ákjósanleg, heldurðu að þetta sé til lengri tíma til þess fallið að bæta þetta í heildarsamhenginu? 

„Ég er sannfærð um það. Afkoma sauðfjárbænda hefur verið sérstaklega bág og það hefur verið þáttur í því sem við erum meðvituð um. Ef við hjálpumst öll að við að lyfta íslenskum matvælum upp á þeim stað sem þeim ber, hjálpi það til við þennan þátt keðjunnar.“ 

Nú erum við komin með tollana og þetta, erum við þá ekki komin með ágætisdekkun? „Ég held það."


Tengdar fréttir

Íslenskt eða hvað?

Við erum að verða of sein á æfingu. Það er búið að vera brjálað að gera í vinnunni og þegar við áttum okkur á því að það eru 20 mín í æfingu stökkvum við af stað. En þegar við erum að bruna af stað byrjar garnirnar að gaula en matartíminn fór eitthvað fram hjá okkur.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×