Alþjóðabankinn varar við skuldavanda þróunarríkja

Heimsljós 18. febrúar 2022 12:25

Hagkerfi þróunarríkja hafa orðið hvað harðast úti í alþjóðlegum efnahagssamdrætti af völdum heimsfaraldurs kórónuveirunnar, segir í nýrri skýrslu Alþjóðabankans. Yfirvofandi skuldakreppa gæti gert illt verra, segir bankinn, ásamt aukinni verðbólgu og vaxtahækkunum. Að mati bankans þurfa þróunarríkin því að skapa heilbrigðara umhverfi fjármálageirans.

Margar fátækustu þjóðir heims standa frammi fyrir alvarlegri skuldakreppu sem flækir stórkostlega viðleitni þeirra til að ná sér eftir efnahagssamdráttinn af völdum faraldursins. Rúmlega sjötíu lágtekjuþjóðir standa frammi fyrir því að auka endurgreiðslu skulda upp á tæplega ellefu milljarða Bandaríkjadala – 140 milljarða íslenskra króna – á þessu ári sem er aukning um 45 prósent frá árinu 2020. Það ár þurftu þróunarríki að auka verulega lántökur.

Í skýrslu þessa árs – World Development Report: Finance for An Equitable Recovery – er fyrst og fremst fjallað um skuldir þróunarríkja. Þar er því haldið fram að skuldasöfnun lág- og millitekjuríka sé alvarlegri en meðal annarra þjóða vegna þess hversu óstöðug hagkerfin eru og þau séu því viðkvæmari fyrir efnahagslegum breytum eins og vaxandi verðbólgu og vaxtastigi.

Alþjóðabankinn er meðal stærstu og áhrifamestu alþjóðastofnana á sviði þróunarsamvinnu í heiminum. Hlutverk bankans er að stuðla að efnahagslegri og félagslegri uppbyggingu þróunarlanda. Bankinn starfar með stjórnvöldum hlutaðeigandi ríkja og veitir þeim aðstoð í formi lána, styrkja og ráðgjafar. Ísland á víðtækt samráð við Norðurlöndin og Eystrasaltsríkin um stefnumótun innan Alþjóðabankans en þessi lönd mynda eitt kjördæmi bankans.

Íslandssíða Alþjóðabankans

Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.

Þróunarsamvinna

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.