Viðskipti erlent

Gaf sjö hundruð milljarða til góðgerðafélags

Samúel Karl Ólason skrifar
Elon Musk, stofnandi og eigandi Tesla, er einn auðugasti maður heims.
Elon Musk, stofnandi og eigandi Tesla, er einn auðugasti maður heims. AP/Susan Walsh

Auðjöfurinn Elon Musk gaf ónefndu góðgerðafélagi hlutabréf í bílafyrirtækinu Tesla sem þá voru um 5,7 milljarða dala virði. Gjöfina gaf hann í nóvember í fyrra yfir nokkurra daga tímabil.

Þetta kom fram í gögnum sem birt voru af Fjármálaeftirliti Bandaríkjanna í gær og er sagt frá í frétt Reuters. Gjöfin samsvarar rúmum sjö hundruð milljörðum króna (710.000.000.000).

Samhliða þessar gjöf seldi Musk hlutabréf í Tesla fyrir 16,4 milljarða dala. Það þurfti hann að gera vegna skattareiknings upp á tæpar tvær billjónir króna eða tvö þúsund milljarða. Sá reikningur var til kominn vegna hlutabréfakaupréttar Musks frá árinu 2012.

Sjá einnig: Selur hlutabréf til að borga tvö þúsund milljarða í skatta

Þá hefur Reuters eftir sérfræðingi að Musk hafi með gjöfinni getað sparað sér háar upphæðir sem annars hefðu þurft að fara í skattgreiðslur.

Musk fær hvorki laun né bónusa frá Tesla og er auður hans tilkominn vegna hlutabréfaeigna hans í fyrirtækinu, sem hefur aukist gífurlega í virði á undanförnum árum. Árið 2012 fékk hann kauprétt á 22,8 milljónum hluta á 6,24 dali stykkið.

Þegar þetta er skrifað er virði eins hlutar í Tesla metinn á rúma 917 dali.

Samkvæmt frétt CNN gerir gjöfin Musk að þeim Bandaríkjamanni sem gaf næst mest til góðgerðarmála á eftir Bill Gates og Melindu French Gates.

Talsmenn Tesla hafa ekki svarað fyrirspurnum um hvert gjöfin fór. Fjölmiðlar ytra rifja þó upp að Musk hét því í fyrra að gefa Sameinuðu þjóðunum sambærilega upphæð ef forsvarsmenn Matvælaáætlunar Sameinuðu þjóðanna gætu sýnt fram á hvernig sex milljarðar dala gætu leyst hungurvanda heimsins.

Stofnunin lagði fram áætlun en talsmenn hennar hafa heldur ekki svarað fyrirspurnum um hvort gjöfin hafi verið til þeirra.


Tengdar fréttir

Ekki Tesla heldur SpaceX sem muni gera Musk að billjónamæringi

Það verður ekki bílafyrirtækið Tesla sem mun mögulega gera Elon Musk, auðugasta mann heims, að fyrsta billjónamæringnum (í dölum talið) heldur geimfyrirtækið SpaceX. Greinendur bandaríska fjárfestingabankans Morgan Stanley telja að SpaceX muni hafa gífurleg áhrif á heiminn og geimferðir.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.