Buffon fyrstur til að halda hreinu í 500 leikjum

Buffon hefur nú haldið marki sínu hreinu 500 sinnum á sínum atvinnumannaferli og er hann fyrsti markvörður sögunnar til að ná þeim merka áfanga.

Ítalski markvörðurinn hefur leikið vel yfir 700 deildarleiki fyrir félagslið sín á tæplega 27 ára ferli ásamt því að eiga 176 leiki fyrir ítalska landsliðið. Hann hefur leikið stærstan hluta ferilsins með Juventus, en hann á að baki 528 deildarleiki fyrir félagið.

Þrátt fyrir að vera orðinn 44 ára gamall er Buffon hvergi nærri hættur. Hann hefur áður sagst ætla sér að spila þar til hann verður fimmtugur, en það verður fróðlegt að sjá hvort að það takist hjá kappanum.