Viðskipti erlent

Peloton og Netflix lækka í virði meðan neysla færist í fyrra horf

Samúel Karl Ólason skrifar
Peloton er sagt ætla að stöðva tímabundið framleiðslu þrekhjóla og hlaupabretta.
Peloton er sagt ætla að stöðva tímabundið framleiðslu þrekhjóla og hlaupabretta. Getty/Joe Raedle

Virði hlutabréfa þrektækjaframleiðandans Peloton hefur hrunið í verði í dag í kjölfar fréttaflutnings um að forsvarsmenn fyrirtækisins ætli sér að draga úr framleiðslu á þrekhjólum, hlaupabrettum og öðrum vegna minnkandi eftirspurnar. John Foley, forstjóri, neitar þessum fregnum en í senn viðurkenni að verið sé að gera breytingar á framleiðslu Peloton.

Útlit er fyrir að ástandið sé að færast í eðlilegt horf hjá fyrirtækjum sem hafi gengið vel í faraldri kórónuveirunnar. Eftirspurn eftir vörum Peloton hafði aukist töluvert samhliða samkomutakmörkunum og lokunum líkamsræktarstöðva víða vegan faraldurs kórónuveirunnar.

Í frétt CNBC sem birt var í gær var vísað í innri skjöl Peloton en þar á að koma fram að eftirspurn hafi lækkað verulega vegna aukinnar samkeppni og breytinga hjá neytendum. Markmiðið með því að stöðva framleiðslu tímabundið væri að koma böndum á aukinn kostnað fyrirtækisins.

Stöðva ætti framleiðslu þrekhjólanna Bike í febrúar og mars og þegar væri búið að stöðva framleiðslu dýrari hjólanna Bike+. Það hefði verið gert í desember og framleiðsla þeirra ætti ekki að hefjast aftur fyrr en í júní.

Þá sagði í frétt CNBC að framleiðsla hlaupabrettanna Tread yrði hætt í einn og hálfan mánuð og ekki stæði til að framleiða eitt Tread+ á þessu ári.

Hefur lækkað um 85 prósent

Í frétt Bloomberg segir að virði hlutabréfa Peloton hafi í kjölfar fréttaflutningsins hrunið um 24 prósent þegar mest var. Frá hátindi þess í faraldrinum hefur virðið lækkað um 85 prósent.

Foley, sem er einn stærsti hluthafi Peloton auk þess að vera forstjóri, varð milljarðamæringur (í dölum talið) í september 2020. Auður hans lækkaði þó og fór undir milljarðinn í nóvember í fyrra. Nú er Foley metinn á um 350 milljónir dala.

Hann sendi minnisbréf á starfsmenn sína í morgun þar sem hann neitaði því að frétt CNBC væri sönn. Í sama mund viðurkenndi hann að verið væri að gera breytingar á framleiðslu Peloton, samkvæmt frétt USA Today.

Einnig hrun hjá Netflix

Hlutabréf Netflix hafa einnig hrunið í virði í dag í kjölfar ársfjórðungsuppgjörs sem vakti litla lukku. Uppgjörið var undir væntingum fjárfesta og við það lækkaði virði hlutabréfa félagsins um 21 prósent.

CNBC segir mestu vonbrigðin snúa að því að fjölgun áskrifenda að Netflix hafi þótt lág og náði ekki markmiðum forsvarsmanna streymisveitunnar.

Sérfræðingar sem Reuters ræddi við segja þetta til marks um að markaðir séu að færast í eðlilegt horf. Fyrirtæki eins og Peloton, Netflix, Zoom og fleiri eigi erfitt með að halda í þann árangur sem náðist þegar fólk var mun meira heima en áður.

Víða sé verið að draga úr samkomutakmörkunum og dregið hafi úr heimavinnu.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.