Tryggingafélagið Vörður og Stofnfélagar Sjóvá almennt með lægsta verðið

Þetta kemur fram í tilkynningu ASÍ. Þar kemur þó fram að endurgreiðslur sem félagar í Stofni, vildarþjónustu Sjóvá, fengju hafi ekki verið tekin með í samanburði á tilboðunum. Félagsmenn í Stofni fái endurgreiðslu af tilteknum trygginum séu þeir tjónlausir í lok greiðslutímabils. Væri endurgreiðslan tekin með í reikningin væru tilboð Sjóvár lægri en tilboð Varðar í þremur tilfellum af fjórum. 

Samkvæmt tilkynningu ASÍ leituðu fjórir einstaklingar eftir tilboðum í tryggingapakka hjá tryggingafélögunum fjórum þar sem leitað var eftir tilboðum í sambærilegar tryggingar og viðkomandi var þegar með. Þá óskuðu tveir einstaklingar eftir tilboðum í bílatryggingar eingöngu. 

Einstaklingarnir fjórir, allir í viðskiptum hjá sitt hvoru tryggingafélaginu, voru fengnir til að óska eftir tilboði í sínar tryggingar hjá öðrum tryggingafélögum. Fólkið var á öllum alddri en þó öll komin yfir þrítugt. Upphæð tilboðanna var á bilinu 300 til 500 þúsund krónur en þau tilboð sem innihéldu fleiri tryggingar voru almennt hærri í verði.

Ökutækjatryggingar voru alltaf dýrastar, þar á eftir húseigendatryggingar, brunatryggingar og fjölskyldu- og heimilistryggingar. 

Vörður var með lægsta tilboð í alla stærri tryggingapakka sem innihéldu margar tryggingar. Tm og VÍS voru með hæstu tilboðin í tveimur tilfellum hvort um sig. Tilboð frá Sjóvá voru næst lægst í þremur tilfellum af fjórum. 

 Mest var 37% munur, eða 88.904 króna, á hæsta og lægsta tilboði tryggingafélaganna í trygginapakka einstaklings sem innihélt meðal annars bílatryggingu, fjölskyldu- og heimilistryggingu og húseigendatryggingu. Þá var Vörður með lægsta tilboðið en TM með það hæsta. 

51 prósenta verðmunur á tilboðum um bílatryggingu

Tveir einstaklingar, sem hvorugur hefur átt bíl, fengu tilboð í ökutækjatryggingar, með bílrúðu- og kaskótryggingu, hjá tryggingafélögunum fjórum. Annar var 20 ára og fékk tilboð fyrir smábíl, 2017 árgerð. Hinn var 30 ára og fékk tilboð í sömu tryggingar fyrir 2014 árgerð af smábíl. 

Meiri verðmunur var á tilboðunum sem yngri einstaklingurinn fékk, 51%, eða 126.545 króna, munur á hæsta og lægsta tilboði tryggingafélaganna í lögbundnar ökutækjatryggingar auk bílrúðu- og kaskótryggingar, þar sem VÍS var með lægsta tilboðið en TM með hæsta tilboðið.

Töluvert minni munur, 8% eða 14.696 krónu, munur var á þeim tilboðum sem eldri einstaklingurinn fékk. Þar var Sjóvá með hæsta tilboðið en Vörður það lægsta. Fram kemur í tilkynningu ASÍ að einhver munur geti verið á tryggingum milli tryggingafélaga vegna ólíkra skilmála og mun á tryggingajárhæðum, sem voru þó stilltar af svo þær væru sem næst því að vera eins. 

Fram kemur í tilkynningunni að verð á tryggingum hafi hækkað umfram hækkanir á vísitölu neysluverðs á síðustu tveimur árum þrátt fyrir mikinn hagnað tryggingafélaganna og háar arðgreiðslur. Á einu ári, frá desember 2020 til desember 2021, hafi tryggingar hækkað um 7,4% og bílatryggingar um 8,3% samanborið við 5,1% hækkun vísitölu neysluverðs. 

Greiðsludreifing geti verið kostnaðarsöm

ASÍ kannaði jafnframt hvert álag tryggingafélaganna væri við greiðsludreifingu, en að mati ASÍ má gera ráð fyrir að þar sem tryggingar vegi þungt í útgjöldum heimila megi áætla að mikill fjöldi tryggingataka kjósi að dreifa greiðslum yfir lengra tímabil, þar sem tryggingapakki geti hlaupið á  hundruðum þúsunda á ársgrundvelli. 

Misjafnt sé hvernig greiðsludreifingu tryggingafélaganna sé háttað en ljóst sé að greiðsludreifing hjá þeim geti verið kostnaðarsöm. Vaxtakostnaður við tólf mánaða greiðsludreifingu á 300 þúsund króna tryggingapakka með 7% vöxtum nemi til að mynda 9.625 krónum á ári en 5.679 séu vextirnir 4,13%.