Körfubolti

Enn einum KR-leiknum frestað en núna ekki út af þeim: Biðin verður 39 dagar

Óskar Ófeigur Jónsson skrifar
Brynjar Þór Björnsson, Adama Darboe og Shawn Glover eftir síðasta leik KR sem var á móti Þór Akureyri um miðjan desember. Glover hefur síðan yfirgefið Vesturbæjarfélagið.
Brynjar Þór Björnsson, Adama Darboe og Shawn Glover eftir síðasta leik KR sem var á móti Þór Akureyri um miðjan desember. Glover hefur síðan yfirgefið Vesturbæjarfélagið. Vísir/Bára Dröfn

Körfuknattleikssamband Íslands hefur gert mikið af því að fresta leikjum vegna kórónuveirusmita og fleiri bættust í hópinn í dag.

Snorri Örn Arnaldsson, mótastjóri KKÍ, sendi frá tilkynningu um frestun í Subway deild karla og 1. deild kvenna.

Leik Tindastóls og KR sem var á dagskrá annað kvöld hefur verið frestað vegna COVID smita í leikmannahóp Tindastóls. Nýr leiktími hefur ekki verið fundinn enn sem komið er.

Leik Snæfells og KR í 1. deild kvenna sem var á dagskrá í kvöld hefur verið frestað um viku vegna COVID smita og sóttkvíar í herbúðum Snæfells.

Karlalið KR var sjálft í vandræðum með smit á dögunum og hefur ekki spilað leik eftir jólafríið.

Leik liðsins á móti Val í 11. umferð og á móti Breiðablik í 12. umferð var báðum frestað og nú bætist við leikur þeirra í 13. umferðinni.

KR lék sinn síðasta leik á móti Þór Akureyri 16. desember síðastliðinn.

Næsti leikur KR er nú 24. janúar en það er frestaði leikurinn á móti Blikum. Spili KR-ingar á þeim degi þá verður það fyrsti leikur liðsins í 39 daga.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.