Skipaður skrif­stofu­stjóri kjara- og mann­auðs­sýslu ríkisins

Í tilkynningu frá fjármála- og efnahagsráðuneytinu segir að Jökull hafi yfir tuttugu ára reynslu af stjórnunarstörfum hjá Arion banka, meðal annars sem forstöðumaður mannauðs og forstöðumaður á þróunar- og markaðssviði. 

„Þá hefur hann einnig reynslu af eigna- og sjóðastýringu sem forstöðumaður í eignastýringu Arion banka og sem framkvæmdastjóri Stefnis hf. Að undanförnu hefur hann starfað sjálfstætt við ráðgjöf á sviði stefnumótunar, mannauðsmála og innleiðingu straumlínustjórnunar. Jökull er með cand. oecon próf í viðskiptafræði frá Háskóla Íslands og hefur jafnframt lokið prófi í verðbréfaviðskiptum og námskeiði í stjórnun hjá INSEAD. 

Alls bárust 17 umsóknir um embættið en þrír umsækjendur drógu umsókn sína til baka. Hæfnisnefnd sem skipuð var af fjármála- og efnahagsráðherra til að meta hæfni og hæfi umsækjenda skilaði greinargerð sinni til ráðherra í samræmi við reglur nr. 393/2012.

Kjara- og mannauðssýsla ríkisins er ráðuneytisstofnun og er hluti af fjármála- og efnahagsráðuneytinu. Hún fer með vinnuveitendahlutverk fyrir ríkið í heild og er leiðandi við mótun mannauðs- og kjarastefnu fyrir ríkið og stofnanir þess og fylgir framkvæmd hennar eftir. Hlutverk KMR er að stuðla að framþróun í starfsumhverfi hjá ríkinu og að styrkja forsendur þess að veitt sé skilvirk og vönduð opinber þjónusta,“ segir í tilkynningunni.