Bein út­sending: AWE - Ný­sköpunar­hraðall HÍ fyrir konur

Kynningarfundur fyrir hraðalinn verður sendur út í netstreymi í hádeginu, en bæði einstaklingar og lið geta tekið þátt í hraðlinum og er frestur til að skila inn umsókn um þátttöku þann 17. janúar næstkomandi

Í tilkynningu frá Háskóla Íslands segir að mikill áhugi hafi verið á hraðlinum þegar hann hafi fyrst farið fram snemma á þessu ári og komust þá færri konur að en vildu. Því hafi verið ákveðið að fjölga þátttakendum og muni fulltrúar allt að fimmtíu viðskiptahugmynda verða teknar inn.

„Markmið hraðalsins er að styðja konur í að þróa áfram viðskiptahugmyndir sínar og fyrirtæki og auka hlut þeirra innan frumkvöðla- og nýsköpunargeirans. Aldrei hefur verið mikilvægara en nú að fjölga sprotum og efla nýsköpun í íslensku efnahagslífi og að sama skapi auka hlut kvenna á þeim vettvangi. Markmið hraðalsins er einnig að bjóða upp á fræðslu og efla tengslanet kvenna.

Hraðallinn er haldinn í samvinnu við Bandaríska sendiráðið en AWE-verkefnið er í boði í yfir 50 löndum víða um heim á vegum bandarískra stjórnvalda. Ísland er fyrst norrænu ríkjanna til að taka þátt í verkefninu.

Nýsköpunarhraðallinn samanstendur af netnámskeiðinu Dreambuilder á vegum Thunderbird School of Management við Ríkisháskólann í Arizona og vinnulotum sem Háskóli Íslands heldur utan um. Ein staðlota verður jafnframt haldin á Akureyri í samvinnu við Háskólann á Akureyri. Að skipulagningu hraðalsins koma einnig Félag kvenna í atvinnulífinu (FKA) og Samtök kvenna af erlendum uppruna (W.O.M.E.N),“ segir í tilkynningunni, en nánar má lesa um málið á vef Háskóla Íslands.

Hægt er að fylgjast með kynningarfundinum í spilaranum að neðan.