Viðskipti innlent

Ó­­­gilda leyfi til stækkunar fisk­eldis Laxa í Reyðar­­firði

Atli Ísleifsson skrifar
Laxar höfðu áður leyfi til sex þúsund tonna fiskeldis en sóttu síðar um 10 þúsund tonna stækkun. Myndin er úr safni og tengist fréttinni ekki beint.
Laxar höfðu áður leyfi til sex þúsund tonna fiskeldis en sóttu síðar um 10 þúsund tonna stækkun. Myndin er úr safni og tengist fréttinni ekki beint. Vísir/Vilhelm

Úrskurðarnefnd umhverfis- og auðlindamála hefur fellt úr gildi heimild til 10 þúsund tonna stækkunar á starfsemi Laxa fiskeldis í Reyðarfirði.

Með úrskurðinum er felld úr gildi ákvörðun Umhverfisstofnunar um heimild til stækkunar og er það gert á þeim grundvelli að umhverfismat áætlana hafi ekki farið fram áður en ákvörðunin var tekin.

Það voru Náttúruverndarsamtök Íslands, náttúruverndarfélagið Laxinn lifi, Veiðifélag Breiðdæla, Veiðifélag Hofsár og Sunnudalsár, Veiðifélag Selár og Veiðifélag Vesturdalsá sem kærðu ákvörðun Umhverfisstofnunar til úrskurðarnefndarinnar.

Laxar höfðu áður leyfi til sex þúsund tonna fiskeldis en sóttu síðar um 10 þúsund tonna stækkun, þar sem í áhættumati Hafró vegna mögulegrar erfðablöndunar milli eldislaxa og náttúrulegra laxastofna í Reyðarfirði, var gert ráð fyrir 16 þúsund tonna eldi að hámarki.

Í úrskurði nefndarinnar er takið að umhverfismat áætlana hafi ekki farið fram áður en Umhverfisstofnun tók ákvörðun um heimild til stækkunarinnar og hafi því verið ákveðið að ógilda hina kærðu ákvörðun um heimild til stækkunar.

„Ekki liggur annað fyrir en að leyfishafi [Laxar] hafi verið í góðri trú þegar hann hóf eldi samkvæmt upphaflegu starfsleyfi, enda bar hann ekki ábyrgð á að umhverfismat áætlana færi fram. Hefur hann m.a. borið því við að ógilding hinnar kærðu ákvörðunar hefði í för með sér sóun verðmæta með tilheyrandi fjárhagslegu tjóni fyrir hann. 

Hér verður í því sambandi að hafa í huga að sá lífmassi sem nú er í kvíum rúmast innan hins upphaflega leyfis sem ekki hefur verið kært og að leyfishafi hefur ekki nýtt sér þá umframheimild sem hin kærða breyting laut að. Verður því ekki séð að ógilding ákvörðunar um þá breytingu fæli í sér þá eyðileggingu verðmæta eða það fjárhagslega tjón sem leyfishafi heldur fram,“ segir í úrskurðinum.

Úrskurðinn má lesa hér.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.